SIBONGA INDLELA ENIBIKE NGAYO NGENQUTHU
MHLELI: Mangibonge indlela ebenibhale ngayo mayelana nokhetho lokuchibiyela kuMasipala waseNquthu mhla zingama-24 kuNhlaba (May) wezi-2017. Ngeke ngisaphawula ngezizathu eziholele ekubeni uze uhlakazwe umkhandlu waseNquthu. Nakhu okumbalwa okwenzeke ngaphambi kokhetho lokuchibiyela eNquthu.
I-African National Congress (ANC) isebenzise amandla obukhondlakhondla bayo ngoba yazi ukuthi izosebenzisa izinsiza zikahulumeni waKwaZulu-Natal ukukhankasa kwazise iningi layo lingongqongqoshe.
Ikhiphe izinkomo, izimbuzi, amakhowe, izijumbana zokudla, ama- voucher ka- R1 000 namathangi oJojo bamanzi ukuthenga amavoti abantu baseNquthu. Phezu kwakho konke lokho, umphakathi waseNquthu wakhombisa ubuqotho bokuthi ngeke uthengwe ngazo zonke lezi zinto, wangaba nandaba nokuthi sekufike abaholi bakazwelonke abayisi-6 noMengameli Jacob Gedleyihlekisa Zuma uqobo.
Kwala ngisho esethi uyabancenga ukuthi noma bengenzanga kahle ngaphambili uyaxolisa ngalokho, ethi mabaphinde bavotele i-ANC kodwa abantu bathi bayamazi umholi ongakaze abaxhophe ngodaka emehlweni, ongakaze abandakanyeke ekudleni izimali zabampofu akha umuzi wakhe.
Lowo mholi uhlale egcizelela ukuthi abantu mabazethembe benze izinto abangaziphilisa ngazo, indoda ongayethemba, uMntwana waKwaPhindangene iNkosi Mangosuthu Buthelezi. Ubezifikela mathupha kubantu engaphethe bukhazikhazi kuphela ehlobe ngobuqotho nezikibha ezimhlophe ezibhalwe ukuthi Sethembe (Trust Us).
Siyawubonga umphakathi wonke waseNquthu ngokuthemba iNkatha yeNkululeko yeSizwe. Nginikeza isiqinisekiso sokuthi umphakathi waseNquthu uzowubona umehluko kule minyaka emine esisele kwazise sekufana nokuthi unyaka wezimali usuphelile njengoba ngenyanga ezayo, uNtulikazi (July), kuzobe kuqala unyaka omusha wezimali. Ithimba leNkatha lizosebenza ngamandla ukuze kuhanjiswe izidingo kubantu baseNquthu, lizophuma emahhovisi kwazise kunomphakathi ongakabi nawo amanzi okuze kwashona izingane zeqa umgwaqo eNdindindi ziyowakha.
Kunemiphakathi engakabi nawo ugesi, imigwaqo engenela emakhaya kayikho esimeni esihle, wububha, amathuba emisebenzi nawo kawekho.
Sifisa ukubona abaholi bomphakathi befana noMntwana waKwaPhindangene okwathi noma ayephethe uhulumeni waKwaZulu owaphela ngo-1994 kwaba nguyena yedwa kondunankulu owahambisa imali engamakhulu ezinkulungwane kuhulumeni omkhulu, waze washo komunye umcimbi wakhe wathi into afisa ukukhunjulwa ngayo uma engasekho kulo mhlaba, wukuthi ubelithanda izwe lakhe.
Wathi into afisa ukukhunjulwa ngayo wukuthi ubelithanda izwe lakhe.