Usizwe yiMeya yaseMsunduzi okwadlwengulwa unina
EZOMPHAKATHI: Ngihlupheke kakhulu emuva kokushona kukamama
SIPHUMELELE isifiso sowesilisa osemncane sokutshela umphakathi ngendlela embi afike ngayo emhlabeni njengoba ethi unina wadlwengulwa, okwenze wazama ukusihushula isisu kodwa kwangenzeka.
UMnu Scelo Mncube (23), ( osesithombeni) waseNtuzuma, enyakatho yeTheku, ubhale incwadi echaza ukuthi unina wadlwengulwa wagcina esethatha izinqumo ezinzima empilweni, ezama ngisho nokukhipha isisu kodwa uNkulunkulu wenqaba naye.
Uthi emuva kokwedlula kukanina emhlabeni, uthwale kanzima engasenayo indawo yokuhlala waze waxoshwa endlini abecuphe kuyona wagcina esehlala emgwaqweni. Uveze nokuthi izingane zakwabo zona bezinaye uyise ozithathile kodwa yena wasala dengwane. Utshele leli phephandaba ukuthi isikole usi- yeke kwaGrade-9 kanti unina yena udlule emhlabeni ngowezi-2006.
“Ngibhale incwadi ethi: "Now I Understand" echaza ngosizi lwami, igqugquzela nabantu ukuthi impilo iyaqhubeka noma ngabe ungaphansi kwezimo ezinzima kangakanani.
"Ngihlupheke kakhulu emuva kokushona kukamama ngowezi-2006. Ngigcine sengisonta e-Evangelical Church ekubeni bekungesiyona into esothandweni lwami kodwa bengenzela ukuba abazalwane bangihawukele, bangikhoselise emizini yabo, nebala kwenzekile lokho,” kusho uMnu Mncube.
Uthi usebhale incwadi yesibili ethi “I was Raped and You were Born” yona-ke ichaza ngokudlwengulwa kukanina nokuthi nakhu yena uyaphila kodwa akamazi uyise.
Uthi izingqinamba adlule kuzona yizona ezimkhuthaze ukuba adlulise lolu lwazi ukuze nabanye bezogqugquzeleka ekutheni babhekane nempilo.
“Kuthe sengibhekabhekile emehlweni, ngezwa kuthiwa uLinda Sibiya wasemsakazweni uzokwenzisa inhlolokhono lapho kufuneka khona abantu abazokwethula izinkulumo ezakhayo, nami ngase ngingenela.
"Lapho ngilale isithathu kubantu abangama-900, kuqale lapho ukuba ngilibone ikhono lami,” kusho uMnu Mncube.
Uthi ngokuhamba kwesikhathi, ulalele umsakazo wezwa kukhuluma uMnu Themba Njilo waseMgungundlovu ongusomabhizinisi oseyimeya yaseMsunduzi, echaza ngezinhle- lo anazo zokusiza abantu abahluphekile. Unikele eMgungundlovu ngemali ayithole ewasha izimoto ngenhloso yokuyobika usizi lwakhe.
Utshele ILANGA ukuthi ulale izinsuku ezintathu ngaphandle kwamahhovisi kaMnu Njilo bengadibani, kulokhu kuthiwa akekho.
“Sigcine sibonene ngamtshela ngekhono lami lokukhuluma nabantu bangilalele, ngempela waqala wahamba nami uma eya emicimbini wanginikeza ithuba ngahlala nakwakhe njengoba sengikwazile nokubhala izincwadi zami,” kusho uMnu Mncube.
Impilo iyaqhubeka ngisho naphansi kwezimo ezinzima kangakanani.