IBHUNGE NGEZINKINGA IMBOKODO YESANTACO
IBIPHUME zinkalo zonke imbokodo esembonini yezokuthutha njengoba ibinengqungquthela ehhovisi leSouth African National Taxi Council (Santaco) eMgungundlovu, maphakathi neKwaZulu-Natal ngeledlule iyodingida ukuthi ingalibamba kanjani iqhaza ukuthuthukisa umnotho waseNingizimu Afrika.
Kuzokhumbuleka ukuthi iningi labesifazane abasembonini yamatekisi - abashiywa ngabayeni babo - bayazibambela kuleli bhizinisi.
Usihlalo wabesifazane kwiSantaco, uNkk Anna Williams, uthi inhloso yomhlangano wabo idalwe yintshisekelo abe nayo uma ebona amathuba asekhona embonini, avulwe wuhulumeni kodwa angathathelwa phezulu yimbokodo.
Uthi bebehlanganele ukubhunga ngezinkinga zokweswela ulwazi lokuthuthukisa amabhizinisi abo embonini, wukungena kwezinye izinhlaka zezamabhizinisi nokuthola uxhaso.
Ubalule ukuthi kayikho into ebaluleke njengokubambisana nokuhloniphana bengabesifazane, babe yisibonelo esihle kwabanye omama. UNkk Thandeka Mbonambi ongumqondisi emnyangweni wezokuthutha, ubengomunye wabebechushisa imbokodo ngamathuba akhona kwezamabhizinisi.
Uchazele imbokodo ngezinhlaka ezahlukene zamabhizinisi engangena kuzona okubalwa ezasemkhunjini, ezezitimela nokusungulwa kwemifelandawonye benze izinto ezinjengokupheka, bathunge inyufomu abayigqokayo nokunye.
UMnu Ramdosise Tsolo, oyisikhulu sakwaTransport Education Training Authority (Teta), udonse imbokodo ngendlebe wathi kumele izifake izicelo zoxhaso ngoba uhulumeni uyayifaka imali yoxhaso lwemboni.
Uqhubeke wafundisa kabanzi omama ngokuvulwa kwamabhizinisi ahlukene. Ubathembise ukuthi uma befaka izicelo zoxhaso ezibonakalayo ukuthi zizoba nenzuzo, iTeta izozixhasa.
Bekukhona nezikhulu ezahlukene kule ngqungquthela, okubalwa kuzona uMnu Jeffrey Ngobese oyinhloko yezoqeqesho kwiSantaco.