U-TRUMP NESINQUMO ESEHLE NGENHLA OWASE-BRITAIN
UMENGAMELI wase-United States of America (USA), uDonald Trump, (osesithombeni) usethathe ucingo waluhloma kuNdunankulu waseBritain, uTheressa May, wamtshela ukuthi akakazimiseli ngokuthatha uhambo lwakhe lwezwe olubheke kwelamaNgisi anduba abantu bakuleliya lizwe bavume ngezinhliziyo ezimhlophe ukuba avakashele kulona.
Uthe akafuni ukuya eBritain uma kusekhona abantu abazobhikisha ngoba bengamfuni. Kubikwa ukuthi inkulumo kaTrump imehle ngenhla uMay.
Lo ndunankulu umeme uTrump emuva kwezinsuku eziyisi-7 egcotshwe ngokusemthethweni njengomengameli wase-USA okwenzeke mhla zingama-20 kuMasingana (January). Ubethatha izintambo kuBarack Obama - ehlula uHillary Clinton okhethweni obelunyakenye.
UMay ube ngumholi wokuqala ukuvakashela uTrump eWhite House - esengumengameli - okuyilapho amumeme khona. Utshele abezindaba ukuthi umeme uTrump nomkakhe uMelania egameni leNdlovukazi yamaNgisi ukuba bavakashe eBritain futhi kumthokozisile ukuthi lo mengameli usamukele isimemo sakhe.
Izincithabuchopho eziningi zaseBritain okubalwa kuzona noLord Ricketts - obengumcebisi kwezokuvikelwa komphakathi - zithe uMay uthathe ngamawala ngesikhathi emema uTrump kodwa-ke kunzima ukuthi lesi memo sesingahoxiswa.
UTrump umemezele uWoody Johnson ongumnikazi weNew York Jets njengenxusa le-USA eBritain kodwa ubengakamqoki ngokusemthethweni.
Wenza lokhu nje, izikhala eziningi zamanxusa e-USA kazikagcwaliswa emazweni amaningi ngenxa yokuthi ithimba lalo mengameli kalikabaqoki ngokusemthethweni abantu okufanele bangene kulezi zikhundla.
Ibamba lenxusa le-USA eBritain, uLewis Lukens, liyinyathele emsileni kuTrump ngesikhathi lincoma uSadiq Khan, oyimeya yaseLondon, litusa ubuqotho bobuholi bakhe mayelana nokuhlasela kwabashokobezi eLondon Bridge nokwaseBorough Market okube sematheni ngokuqala kwale nyanga.
ULuckens uncoma uKhan nje, uTrump usanda kuyigxeka le meya ngendlela eluphathe ngayo udaba lokuhlasela kwabashokobezi, ehlanekezela inkulumo yayo ebiyibhekise ezakhamizini zaseLondon ithi mazingangenwa ngamanzi emadolweni ngenxa yokugcwala kwamaphoyisa ahlomile kuleliya dolobha.
Ihhovisi likaKhan likuvezile ukuthi kubukeka sengathi uxamu ugeje umgodi kuTrump kodwa yena wasola le meya ngokwenza izaba ezingathi shu ngodaba lwabashokobezi.
UKhan ube esenxusa uhulumeni waseBritain ukuba ukuhoxise ukuvakasha kukaTrump yize belungekho usuku obelunqunyiwe ukuthi uzoya nini kwelamaNgisi.
Imizamo yeBritain yokuba yibhuloho elihlanganisa i-Europe ne-USA isithanda ukufenya kusukela emuva kwevoti lokuthi iBritain inqume ukuphuma ngaphansi kwe-European Union (EU) - okuyinto eyaziwa ngeleBrexit - nesenzo sikaTrump sokweseka imigomo enenga abahlobo be-Europe.
Kusukela kwasekuqaleni, uTrump ubeyeseka eyeBrexit, kwesinye isikhathi abonakale efuna ukuqhekeza phakathi i-EU. Umthombo Angabe; TheGuardian. com