UMchunu uzibeke ethubeni lokulwela ibhande leWBC
ISIBHAKELA: Ugeze igama ebukisa ngoMuller kweye-ABU
ULIGEZE ngendlela esezingeni eliphezulu igama lakhe uThabiso “The Rock” Mchunu waKwaXimba obukise ngoJohnny Muller empini yebhande laseNingizimu Afrika nele-African Boxing Union (ABU) Cruiserweight ngoMgqibelo ebusuku e-Emperor’s Palace, eGauteng.
UMchunu bekubhekwe ukuthi abuyise isithunzi sakhe njengoba ehlulwe kabuhlungu ngu-Oleksandr Usyk wase-Ukraine ngonyaka odlule e-United States of America (USA). UMchunu uyilwe kahle le mpi njengoba eyinqobe yonke imizuliswano.
Ubelwa ngendlela eyodwa kusukela impi iqala kwaze kwaba iyaphela.
Leli bhokisa lijwayele ukuba namandla emizuliswaneni eyisihlanu yokuqala bese lihlaselwa wukukhathala kwelandelayo.
Nokho-ke uMchunu ubebuye asetshenzelwe wukushaya uMuller ezindaweni ezibucayi obekwenza uThabo Spampool obengunompempe kule mpi alokhu emkhuza njalo.
UMchunu usengene shi ezili- nganisweni zeWorld Boxing Council (WBC) okumsondeza eduze nokulwela ibhande elikhulu lale nhlangano.
Ngemuva kwempi uMchunu ubonge abantu abebephume ngobuningi ukuzomeseka yize amakhaza abeshubisa umnkantsha eGauteng ngempelasonto.
USimphiwe Khonco uvikele ibhande le-International Boxing Organisation (IBO) Strawweight okwesibili ehlula ngamaphuzu uLito Dante wasePhilippines.
ULee Dyer oyingqwele yakuleli yeMiddleweight ulwe ngokulingana no-Alfonzo Tissen bebanga ibhande le-ABU Super Middleweight. Le mpi yiyona ethakaselwe ukuzedlula zonke ngoMgqibelo.
UThulani Mbenge uhlule uJay Inson wasePhilippines ngamaphuzu kweyeWelterweight. UMbenge ubeqala ukuqeda imizuliswano njengoba esezakhele udumo ngokusheshe aqede ngezitha zakhe.
Lezi zimpi bezihlelwe nguRodney Berman weGolden Gloves Promotions osekunesikhathi eside eyibambe emkhakheni wokuqhathwa kwezimpi zesibhakela kuleli nasemazweni angaphandle.