Bavulelwa elokudlala kwiPSL
Izohanjelwa yizilomo iJozini Mayoral Cup
ITHUBA lokuzibonakalisa kumakilabhu ePremier Soccer League (PSL) kubadlali baseJozini abazokhiphana inkani kwiJozini Mayoral Cup ezokuba ngoMgqibelo eNdumo Sports Ground kuleya ndawo.
Le midlalo sekunesikhathi iqalile kuma-ward angama-20 akhele umasipala waseJozini.
Phakathi kwamakilabhu okuthiwa azohambela le midlalo kubalwa iLamontville Golden Arrows, iMaritzburg United, iThanda Royal Zulu, AmaZulu FC, iReal Kings United, iKZN Academy neThongathi FC esanda kunyukela kwiNational First Division (NFD).
UHelman “Ncane” Mkhalele wodumo kwi-Orlando Pirates neBafana Bafana noBongani Yengwa oke walolonga iBanyana Banyana, bazodidiyela isikwati sika-U/17 saseJozini esizohlelelwa imidlalo nezikwati zeMultiChoice Diski Challenge (MDC) zamakilabhu agijima kwi-Absa Premiership.
Le midlalo izohanjelwa nguSiyabonga Mpontshane ovimbela iBucs, uPhakamani Mahlambi weBidvest Wits noSiphelele Ntshangase weBlack Leopards.
UDelani Mabika oyiMeya yaseJozini, uthe leli yithuba labafana bakule ndawo lokuzidayisa kula makilabhu.
Uthi ngoLwesihlanu kuzokuba nomcimbi wesidlo sakusihlwa okuzobhungwa kusona ngamasu okuthuthukisa ibhola kule ndawo. Kuzophinde kubhekane izingwazi zaKwaZulu-Natal nesikwati saseJozini.
Kubadlali asebethathe umhlalaphansi kunobhutshuzwayo okubhekwe ukuthi babe yingxenye yalo mdlalo kubalwa uSipho Zimba, uSiyabonga “Nsimbi” Sangweni, u-Effort Sithole, uSithembiso Ngcobo, uPapi “Ginger” Zothwane, uNtokozo “Koloba” Sikhakhane, uNhlanhla Mshibe, uVusi “Kanu” Vilakazi, uBheka Phakathi, uSiphesihle Ngobese, u-Andile “Sguda” Cele, uMbulelo “OJ” Mabizela, uSandile “AK47” Ndlovu ukukha nje phezulu.