Uncoma izifundo zabaqeqeshi kwiSafa eThekwini
BATHOLE uqeqesho lwezinga elicokeme abaqeqeshi baseThekwini abebehlelelwe izifundo zeD Licence eziphasiswe yiSouth African Football Association (Safa).
ISafa eThekwini ibihlukanise abaqeqeshi baba ngamaqoqo amabili akhandwe ngabantu abangama-40.
Abanye benze lezi zifundo phakathi nesonto kwathi enye ingxe-nye yazenza ngempelasonto.
UNathi Ngcobo onguNobhala weSafa eThekwini, uthi lezi zifundo zimqoka kakhulu ngoba zinika abaqeqeshi ulwazi olunothile ngonobhutshuzwayo.
Uthi lezi zifundo zelama abebezihlele neBritish Council ngoNdasa (March) kophezulu.
UNgcobo uthi bajabule kakhulu ngoba ithimba labaqeqeshi beThongathi FC esinyukele kwiNational First Division (NFD) lithole ulwazi lokuqeqesha ezifundweni zabo.
IThongathi ibigijima kwiSafa KwaZulu-Natal ABC Motsepe League, kanti ingene kwiNFD ngemuva kokugila izimanga emidlalweni yokuhlungela ukwenyukela kulesi sigaba esongwe izolo ngeSonto eMonti, e-Eastern Cape. KUZOKHUTHAZWA umphakathi waseMlazi namaphethelo ngobumqoka bokunikela ngegazi kwiFun Run ezokuba ngoLwesihlanu lweholidi LoSuku LweNtsha olungomhla zili-16 kwephezulu ezosukela eKing Zwelithini Stadium isongwe eMega City kuleli lokishi elingelesibili ngobukhulu eNingizimu Afrika.
AbakwaSouth African National Blood Service (SANBS) bazokube bekhona bezogqugquzela umphakathi ukunikela ngegazi. Kuzokuba khona nenhlangano engenzi nzuzo ezokhuthaza abantu ngokubaluleka kokuhlolelwa ingculazi nesandulela sayo. Amafomu okungenela lo mjaho ayatholakala eMega City, kanti uvuleleke kubona bonke abantu.
Kuzophinde kube nemidlalo yama-Aerobics nayo evuleleke kubona bonke abantu.