KUZOHLOMULA IZINGANE NGOKUBUKA AMABHOKOBHOKO ETHEKWINI
IMEYA yeTheku uZandile Gumede ihlela ukusiza izingane ezingenawo amandla okubuka umdlalo wombhoxo ukuze zithole ithuba elingandele bani lokuba yingxenye yokuqoshwa komlando.
ISouth Africa A izogadulisana neFrench Barbarians kowebhola lombhoxo ozokuba ngoLwesihlanu ngo-16h45 eMoses Mabhida Stadium, eThekwini. Kulo mdlalo kuzoqopheka umlando njengoba kuzokube kungokokuqala ngqa kudlalwa umbhoxo kule nkundla selokhu yasungulwa.
IMeya iveze ukuthi isezinhlelweni zokuzama ukuthi inike abantwana abangenawo amandla ithuba lokuyobuka lo mdlalo.
“Nakuba kungekho osekuqinisekisiwe kodwa sizozama ukuxoxa nezikole ukuba zilethe izingane kulo mdlalo. Sijabule kabi njengoba kuzoqopheka umlando kule nkundla ukuthi kudlalwe umbhoxo okokuqala ngqa kuyona. Sifuna ukutshengisa umhlaba wonke ukuthi le nkundla sikwazi ukuyisebenzisela imidlalo enhlobonhlobo.
“Kasifuni lo mdlalo kube ngowokuqala nowokugcina, sizozama ukuthi lo mcimbi ube minyaka yonke. Kodwa okumqoka kunakho konke ukuze konke kube yimpumelelo kufanele sakhe ubudlelwano obuhle nenhlangano ephethe ibhola lombhoxo kuleli,” kusho iMeya uGumede esithangamini sabezindaba ngoLwesihlanu ntambama khona eMabhida.
Emuva kwalesi sithangami izintatheli nezicukuthwane zitshengiswe inkundla ebesiqala ukufakwa amapali ebhola lombhoxo. Utshani bebubukeka busesimweni esigculisayo futhi buluhlaza cwe.
Nokho kunovalo lokuthi lezi zidlakela zebhola lombhoxo zizo-yishiya imazombezombe kanti kuzokuba nomdlalo wamanqamu weNedbank Cup phakathi kwe-Orlando Pirates neSuperSport United ngempelasonto elandelayo.
UVusi Mazibuko oyiMenenja yale nkundla, uthi imimoya phansi, umdlalo weNedbank uzofika inkundla isezingeni lo mhlaba.
“Sinazo izinhlelo esiphezu kwazo zokulapha isimo esizokwenzeka emuva kwalo mdlalo webhola lombhoxo.
Imimoya phansi kubalandeli sinazo izinhlelo esiphezu kwazo zokuyilungisa, umdlalo kanobhutshuzwayo uzofika isesimweni esihle,” kusho uMazibuko.