I-CHIEFS EZINHLELWENI ZOKUTAKULA UTHULANI SERERO
UKHALA ngokubanjezelwa yiSouth African Football Association (Safa) u-Owen da Gama ( osesithombeni) obengumsizi ka-Ephraim “Shakes” Mashaba oxoshwe ngasekupheleni konyaka odlule esigqikini sokuba ngumqeqeshi weBafana Bafana.
UMashaba ukhonjwe indlela yiSafa ngenxa yokuhlulwa wukuziphatha. Ubengeneme ngokuxoshwa kwakhe wase ebopha iSafa. Ugotshwe wukuvalwa umlomo yiSafa ngemali. Nokho iSafa inqume ukuqasha uStuart Baxter njengomqeqeshi omusha weBafana.
Ukuqashwa kwalo mqeqeshi kwenze uDa Gama waphumela obala ukuthi akazimisele ngokuba ngumsizi uzoncamela ukuphuma ayofuna umsebenzi kwenze indawo. Kuze kube yimanje bekungakacaci ngekusasa lalo mqeqeshi.
Ekhuluma neLANGA uDa Gama, ukhale ngokuchithelwa isikhathi yiSafa ekubeni kunamakilabhu agijima kwi-Absa Premiership amfunayo.
“Kunamakilabhu amabili angishayele efuna ukungiqasha kodwa kangikwazi ukwenza lutho ngoba ngisanenkontileka neSafa. Okungiphatha kabi wukuthi babethe sizohlangana ngoLwesihlanu (lokugcina lwenyanga edlule) kodwa akwaze kwenzeka. Baphinde bangithembisa ukuthi isonto eledlule ngeke liphele singahlangananga kodwa liphelile. Ibuhlungu le nto ngoba ngiyantunta nje emahhovisi eSafa kodwa ngibe ngazi ukuthi kangiyilutho. Umhlangano wethu kangikholwa ukuthi uzodonsa, cishe uzokuba ngaphansi kwehora bese sihlukana ngokuthula. Sengithembe ukuthi leli sonto eliqalayo lizophela sekucacile ukuthi kwenzakalani ngami ngoba isikhathi siyahamba,” kubalisa uDa Gama. Imizamo yokuthola uDennis Mumble oyisikhulu esiphezulu kwiSafa iphunzile njengoba ucingo lwakhe beluvaliwe. IKAIZER Chiefs isezinhlelweni zokutakula umdlali weBafana Bafana osehlale iminyaka eminingi e-Europe okuvela ukuthi usanda kuchayiswa nayikilabhu yaseSpain.
Ikusasa likaThulani “Cream” Serero odlala esiswini kwi-Ajax Amsterdam yaseNetherlands libukeka lishona phansi njengoba izinto zingamuhambeli kahle. Lo mdlali ngesizini edlule ubewukudla kwebhentshi, isikimu esizwa ngendaba. Uke wafunwa yiReading yase-England kodwa izinto zangalunga ngenxa yokukleliswa kude kweBafana ezibalweni zeFederation of International Football Association (Fifa).
Kuphinde kwavela ukuthi iDeportivo La Coruna yaseSpain iyamfuna kodwa yabuye yahlehla.
ILANGA lihabule ngemithombo yalo ukuthi uBobby Motaung oyiMenenjajikelele yeChiefs uzama ngawo wonke amandla ukuncenga lo mdlali ukuba azogijima kwiChiefs. Kuthiwa inkontileka yalo mdlali ne-Ajax iyaphela uma kusongwa le nyanga okusho ukuthi unalo ilungelo lokuxoxa nanoma iyiphi ikilabhu emfunayo.
“USerero useNingizimu Afrika, usapholisa ikhanda njengoba izinto zingamuhambeli kahle kulezi zinsuku. Kubukeka i-Ajax ingeke isamugcina njengoba ingakaze isho lutho ekubeni inkontileka yakhe iphela. Ungitshele ukuthi angakujabulela ukubuyela kuleli, usekhumbula ekhaya.
“Ukubeke kwacaca ukuthi angakujabulela ukubuya adlale kwiChiefs ngoba yiyona kuphela ekhombisa ukumfuna. Maduzane nje uzohlangana nayo babhunge ngodaba lwenkontileka, vele iChiefs ngeke ikhokhe imali ngaye ngoba inkontileka yakhe iyaphela uma kusongwa le nyanga.
“Into engase iphazamise iChiefs yiVitesse Arnhem yaseNetherlands nayo emuhluphayo, efuna azoyidlalela. Kodwa kuzocaca ngokuqhubeka kwezinsuku ngoba njengamanje uyafana nomuntu ongenakilabhu,” kusho lo mthombo oncikene kakhulu noSerero.
Leli phephandaba lishayela uMotaung ngalolu daba, uthe okwamanje akukho angakusho kodwa wakuqinisekisa ukuthi ikilabhu izama ukusayinisa abadlali abaseqophelweni eliphezulu.
“Uma sekukhona esiqedile nabo sizomemezela okwamanje akukho okuphathekayo engingakusho. Futhi-ke sinenkinga uma nje sike saphumela obala sathi sifuna umdlali wonke umuntu uvele amgijimele. Kungcono simemezele yonke into uma sesiqedile,” kusho uMotaung.