Ujabule wabuya nganeno uBaxter
Akeneme ngamathuba amoshwe yiBafana
UJABULE wabuya nganeno uStuart Baxter ongumqeqeshi weBafana Bafana ezakhe zinqoba umdlalo omqoka ebezinganikwa lutho kuwona.
IBafana iqophe umlando ihlulela ekuhambeni okokuqala ngqa iNigeria ngo-2-0 emdlalweni wokuhlungela i-Africa Cup of Nations (Afcon) ngoMgqibelo kusihlwa eGodswill Akpabio International Stadium, e-Uyo, kulona leliya lizwe.
Amagoli okunqobe ngawo iBafana avalelwe enethini nguTokelo Rantie noPercy Tau.
IBafana bekufanele iwunqobe ngembudlu yamagoli lo mdlalo kwazise ishwebe inqwaba yamathuba alula.
UThemba Zwane ushaye ipali kabili, uLebogang Manyama wahlulwa wuqekelele sekufanele aphushele ibhola enethini.
Ngaphandle kwala mathuba, maningi amanye amabhola iBafana ewatholile kodwa yangawasebenzisa ngendlela efanele.
UBaxter obekuwumdlalo wakhe wokuqala lona njengoba eshaya ibuya kulesi sikhundla, uzwakalise ukungenami ngenkinga ayibona izobashaya ngokuhamba kwesikhathi.
“Ukudlala sidlale kahle futhi ngijabulile ngokuthi sizibeke emlandweni sanqoba okokuqala ekuhambeni iNigeria.
Kodwa kangeneme ngendlela esiyeke ngayo amathuba, ngelinye ilanga siyowakhalela la mathuba sesihluliwe.
Lo mdlalo besingawunqoba nangamagoli ayisihlanu ukuba siwavalele enethini wonke amathuba esiwatholile.
“Kodwa kuningi engikhanyiseleke kukona kulo mdlalo okufanele ngisebenzele phezu kwakho. Umsebenzi usemkhulu kodwa izinto zizohlangana,” kusho uBaxter.
IBafana izobuya eNigeria idudulane neZambia kowesihle kusasa ngoLwesibili ngo-19h00 eMoruleng Stadium, eNorth West.
UBaxter uthi lo mdlalo uzowusebenzisa ukuhlola abanye abadlali.
“Njengamanje kawukho umdlalo esiwuthatha kancane, yonke sifuna ukuyinqoba.
"Lo mdlalo weZambia ngizowusebenzisa ukubheka abadlali abathile. Ngizonika futhi nabadlali abasebancane ithuba kuwona.
"Lokho kakuchazi ukuthi kangifuni ukuwunqoba noma kanjani sidinga iwini kuwona.
“Phela sizokube sidlala okokuqala ekhaya selokhu ngibuyele kwiBafana.
"Ngifuna ukubingelela abalandeli basekhaya ngewini,” kusho uBaxter.
Amathikithi alo mdlalo aseqalile ukudayisa, abiza u-R40 kanti atholakala eComputicket nasezitolo zakwaShoprite/ Checkers ezweni lonke.