UBassie nephupho lokuba nesiteshi
UTHI uzolwa kuze kufinyelele ekugcineni ukufeza iphupho lakhe lokusungula isiteshi sikamabonakude esizimele uBasetsana Kumalo, onenkampani ekhiqiza izinhlelo ezahlukene, iTswelopele Productions.
UBassie, njengoba abuye abizwe kanjalo, uveze lokhu ngoMgqibelo ngesikhathi kunomcimbi wokumhlonipha ngokuchonywa uPhaphe Lwegwalagwala obuseRadisson Blue Hotel, eSandton, eGoli, lapho ebehlonishwa khona yinhlangano yosomabhizinisi, iMzansi Business Forum.
Kulo mcimbi uBassie uhlonishwe nabanye okubalwa uMax Lichaba onguSihlalo weLichaba Creations eyenza ubucwebe noMiles Kubheka weVuyo’s Restaurants kanti ubuhanjelwe nawuNgqongqoshe wezeziMali, uMalusi Gigaba.
UBassie inkampani yakhe esike yakhiqiza izinhlelo okubalwa kuzona iTop Billing, iSes’khona, Our Perfect Wedding, Utatakho, Date My Family, Diski Divas, Please Step In, Boot Camp nezinye, utshele izicukuthwane ebezihambele lo mcimbi ukuthi iphupho lakhe wukusungula isiteshi sikamabonakude sokuqala somuntu wesifazane omnyama eNingizimu Afrika.
“Ngiyazi ngeke kube lula kodwa ngizokwenza ngakho konke okusemandleni ami ukuqinisekisa ukuthi ngiyalifeza leli phupho.
"Kusukela ngiqalile ukukhiqi- za imidlalo kamabonakude, ngiyaqinisekisa ukuthi ngiveza isithombe esihle ngempilo yomuntu omnyama,” kusho uBassie.
Uthi kubuhlungu ukuthi izindaba zomuntu ompisholo zixoxwe ngabanye abangaziqondi kahle kugcine sekuvela isithombe okungesona.
Kulo mcimbi uNgqongqoshe uGigaba unxuse osomabhizinisi abamnyama ukuba babumbane baqinisekise ukuthi bayesekana ukuze umnotho wezwe ungasabalali ezandleni zabathile kuphela.
Umengameli weMzansi Business Forum, uSiya Xulu, naye uhambe emazwini kangqongqoshe wenanela ngokuthi njengenhlangano yosomabhizinisi baqhuba umkhankaso obizwa ngokuthi #ISupportBlackBusiness.
Uqhube ngokuthi kuyabajabulisa ukuthi amalunga abo ayaqhubeka nokwanda njengoba asefinyelele ku-15 000 eminyakeni emithathu isunguliwe le nhlangano.