I-DA izochazela i-EFF ngesinqumo
EZEPOLITIKI: Mayelana noZille
IZIMISELE ngokuhlala ne-Economic Freedom Fighters (EFF) ibonisane nayo ngesinqumo sayo sokugcina uNkk Helen Zille esikhundleni sokuba nguNdunankulu waseWestern Cape iDemocratic Alliance (DA).
Lokhu kutshelwe ILANGA nguMnu Zwakele Mncwango ongumholi we-DA KwaZulu-Natal aphinde abe sesigungwini sayo esiphezulu kuzwelonke.
NgoLwesibili iDA imemezele ukuthi uNkk Zille uyahoxa kuzona zonke izigungu ezithatha izinqumo kuleli qembu kodwa uzoqhubeka nokuba ngundunankulu waseWestern Cape - okuyinto enyuse izinhloze kwabanye abantu kubalwa ne-EFF, okuyiqembu elivota neDA kwabanye omasipala okubalwa kubona iNelson Mandela Bay, iTswane neJohannesburg.
Esigcawini sabezindaba uNkk Zille uxolisile ngombhalo wakhe kwiTwitter - okuyiwona omdalele amazinyo abushelelezi, wasolwa ngokuthela iqembu lakhe ngehlazo - obukhombisa ukweseka ubukholoni.
Lo mbhalo kaNkk Zille ususe omkhulu umsindo iningi limgxeka ngawo. Lokhu kuholele ekubeni kube neziphakamiso zokuthi amiswe kwiDA noma akhonjwe indlela.
Esigcawini sabezindaba ebesingeledlule, uKhomanda Omkhulu weEFF, uMnu Julius Malema, uthe uma iDA ingamkhombi indlela uNkk Zille, iqembu lakhe lizohoxa ebudlelwaneni nayo kubona bonke omasipala evota nayo kubona.
UMnu Mncwango utshele ILANGA ukuthi uyakuqonda okushiwo nguMnu Malema kodwa bazimisele njengeqembu ukuba babonisane ne-EFF ukuze isiqonde isizathu esibenze bafinyelela kulesi sinqumo.
“UMnu Malema uyakuqonda ukuthi uma ehoxisa ubudlelewano uzobe enikezela ngalabo masipala kwi-ANC nakumaGupta, ngakho okwethu wukuba simenze aqonde ukuthi kungani sikhethe ukumgcina uNkk Zille njengondunankulu. Inhloso yethu enkulu wukubheka unyaka wezi-2019 (wokhetho) , ngakho-ke ngeke sikuvumele ukuphazamiseka ezinhlelweni zethu ngoba isinqumo esi-sithathile kakusona eseDA kuphela kodwa sibheke iNingizimu Afrika njengoba kunesimo esibhekene naso sokuwa komnotho,” kusho uMnu Mncwango.
Uthi uyakuqonda ukuthi isinqumo abafinyelele kusona ngeke sijabulise bonke abantu kodwa uma behlangana nabo bonke abathintekayo bebachazela ngesizathu sokufinyelela kusona kuzokwenza bacaciseleke.
Umhlaziyi wezepolitiki ozimele, uDkt Somadoda Fikeni, uthi isinqumo seDA besingelula kodwa bekumele ibheke izinhlangothi zonke njengoba lesi sigameko sesilihlukanisile iqembu.
“Kuyiqiniso esingeke siliphike ukuthi kunoqhekeko phakathi kwamalunga amnyama namhlophe kwiDA.
"Lesi sinqumo isithathe ngokubheka abayinikelela ngezimali, okuyibona abahambisana noNkk Zille, ngakho-ke bekungelula nje ukuba akhonjwe indlela ngokugcwele eqenjini,” kuchaza uDkt Fikeni.
Ngasohlangothini lwe-EFF, uveze ukuthi akayiboni ihoxisa ubudlelwano bayo neDA njengoba bebheke ukwenza kahle okhethweni ngowezi-2019.
“UMnu Malema uyazilimaza uma enza izinkulumo ezifuze lezi bese ejika kuzona ngoba lokho kumenza umuntu ongabambeleli ezwini lakhe kubalandeli bakhe,” kusho yena.
Khona manjalo, iDA icacise mayelana namakhansela ayo kuMasipala iMogale City, eGauteng ahlolelwa ukuqamba amanga.
Umholi waleli qembu eGauteng, uMnu John Model, uthi yiwona amakhansela aziqokele ukuhlolelwa amanga emuva kwesinqumo sokuketula imeya ebithunywe yileli qembu eMogale City, uMnu Michael Holenstein.
UMnu Holenstein uketulwe ngesonto eledlule ngemuva kokuvota kwamaqembu ahlukene kulo masipala.
UMnu Moodey uthi beyiqembu kabazange bawaphoqe amakhansela ukuba abe yingxenye yalolu hlelo lokuhlolelwa amanga njengoba kube yiwona akhokhele ukuba ahlolwe.
Izolo ngoLwesithathu kugcine kubhuntshile ukuqokwa kwemeya entsha eMogale City emuva kokuba amaqembu okubalwa kuwona i-DA, EFF neNkatha Freedom Party (IFP) engalubhadanga emhlanganweni womkhandlu.
Lesi sinqumo isithathe ngokubheka abayinikelela ngezimali okuyibona abahambisana noNkk Zille, ngakho-ke bekungelula nje ukuba akhonjwe indlela.