ITHEMBISA UHOLO OLUNGENANKOHLAKALO EYE-IFP
ITHEMBISA ukuba yilanga lasebusika enkohlakalweni imeya entsha yaseMzinyathi, uMnu Petrus Ngubane, engene kulesi sikhundla ngethikithi leNkatha Freedom Party (IFP). Igcotshwe nabanye ozakwabo ngoLwesibili ukuhola lo masipala.
Kuzokhumbuleka ukuthi uMasipala wesiFunda waseMzinyathi uke wafana nesitimela esingenakhanda njengoba ubungenabuholi ngenxa yokuthi izinto bezijamile ngowaseNquthu oyinkonyane lawo - selokhu kuvotiwe mhla zintathu kuNcwaba (August) nyakenye.
Aphelile amaphupho mhla zingama-24 KuNhlaba (May) nonyaka i-IFP ibhaxabula i-African Natiobal Congress (ANC) ngevoti yamuka nayo iNquthu.
UMnu Ngubane ubonge iqembu lakhe ngokumqokela kulesi sikhundla ukuba alimele lona nomphakathi wonkana waseMzinyathi.
“Ngithembisa ukusebenza ngokuzikhandla ukuze izidingo zizoya ngamandla ebantwini. Ngifisa ukuziqhelelanisa nenkohlakalo, kangiyifuni nje nalapho ihambe khona.
"Ngicela sibambisane makhansela amaqembu wonke ukuze sizokwazi ukuhambisa intuthuko kubantu.
Eqhulwini ngibeke ezokuthuthukiswa kwezolimo ngoba ngibuka ukuthi inhlabathi yethu ivundile futhi ikhona imifula enamanzi lapha njengaseMvoti.
"Ukuthuthukiswa kwezinhlelo zentsha, imifundaze, imidlalo yeshashalazi, ukubhekelelwa kwabantu abaphila nokukhubazeka, osomabhizinisi abasathuthuka nokunye okuningi engisa- zophuma nethimba lami siyokuzwa kubantu abasivotele,” kusho uMfu Ngubane oke waba yimeya yaseMvoti.
Utshele ILANGA ukuthi ugabe ngesipiliyoni nangeziqu ezahlukene.
“Ngiyethemba ukuthi ngeke ngehluleke ngoba okuningi ngikufundele okuhlanganisa ukuphathwa komasipala. Ngokomsebenzi nginguthisha kodwa sengizogxila ekusebenzeleni umphakathi,” kusho uMnu Ngubane.
I-IFP iziqoqe zonke izikhundla ezibalulekile njengoba isekela lemeya kunguNkk Ntombi Mdlalose kanti kwesikasomlomo kwaba nguMnu Felinkosi Skhakhane obeyimeya eMsinga ngaphambi kokhetho lwanyakenye. Nakwi-Executive Committee (Exco) kukhonya yona iNkatha kulo mkhandlu obunjwe ngamaqembu amabili, okuyi-IFP ne-ANC. Unamakhansela angama-27. Awe-IFP ali15 kanti awe-ANC ali-12.
I-IFP ithatha lo masipala nje, kuke kwaba nezinsolo zokuthi kujanyiswe izinto eNquthu ngoba kunovalo lokuthi uma ike yawuthatha izofica amanyala enkohlakalo abenziwa phambilini kusaphethe i-ANC.