Yethulwa ijoka intsha yaseNdwedwe
Kwakhiwa isikhungo sokuhlolela izincwadi zokushayela
IGCAGCELE esokeni kubantu abakhele uMasipala waseNdwendwe, enyakatho yeTheku njengoba lo masipala umemezele ukuthi uzovula isikhungo sokuhlolela izincwadi zokushayela.
Lesi sikhungo okulindeleke ukuba sisize kakhulu abantu abasha, sidle lo masipala u-R12 million, sizokwakhiwa eduze kwamahhovisi kamasipala okukhona umtholampilo ngakuwona, kanti umasipala uzoba namaphoyisa awo omgwaqo.
Kulindeleke ukuba siqale ukukwakhiwa ngoNtulikazi (July).
Ngokusho kwemeya yalo masipala, uMnu Nkosinathi Chili, phambilini bekubhoboka amaphakethe kubantu abasha bakule ndawo uma befuna izincwadi zokushayela futhi belinda isikhathi eside uma beyobhukhela ukubhala i-leaner’s license nezincwadi zokushayela njengoba bebesebenzisa isikhungo esiseVerulam (okuyibanga elingaphezulu kwama-41 km ukuya kuphela), esigcwala ngendlela exakile.
UMnu Chili uthi abanye bebeze badlulele kwesinye esiKwaDukuza (okungaba yibanga elingaphezulu kwama-62km ukuya nje kuphela), ogwini olusenyakatho yeKwaZuluNatal naseMgungundlovu (okuyi- banga elingaba ngama-98km) obekubenza bakhokhe imali enkulu yokugibela. Imeya ithi ukuthuthukiswa kwabantu abasha kuseqhulwini ezinhlelweni zentuthuko kulo masipala.
“Ukungabikhona kwesikhungo sokuhlolela ukushayela kule ndawo yethu bekubalimaza kakhulu abantu abasha njengoba abanye bebegcina sebephuthelwa yimisebenzi esuke idinga izincwadi zoku- shayela kwazise besiside kakhulu isikhathi abebesilinda eVerulam.
"Lesi sikhungo sizokwakhiwa kanye neMulti-Purpose Centre yona ezokwakhiwa ngasesikhungweni somtapo wolwazi. Yona idle uR5 million.
"Kulesi sikhungo abantu abasha bazokwazi ukudlala imidlalo enhlobonhlobo baphinde basisebenzisele ukuzicijela amakhono athile okungaba wukudansa no- kunye njengoba sizokwakhiwa ngendlela yesimanje manje.
Sizokwakha nenkundla yezemidlalo edle u-R11.5 million.
"Kule nkundla abantu abasha bazodlala ngisho ebusuku ngoba izobe inamalambu akhanyisayo.
"Sikhathele yile nto yokuba uma kufanele sidlale ebusuku sigibele siye eVerulam ngoba kumnyama kwezethu izinkundla. Le ndawo izophinde isize nomphakathi wo- nkana njengoba izoba nehholo elikhulu lokwenzela imicimbi efana nemishado namafestivali,” kusho imeya.
ISekela-meya, uNkk Nokulunga Blose, lithe izinhlelo zokufakela abantu ugesi zihamba kahle kakhulu kule ndawo njengoba emabili kuphela manje amawadi angenawo ugesi okuwuwadi-2 no-8.
“Kumanje inkontileka imatasa nokufaka izigxobo zikagesi kuwadi-16. Abantu bakule wadi zizophela izinyanga eziyisi-6 sebekhanyisa. Bayi-1096 abantu abazohlomula kulokhu kufakwa kukagesi.
"Namhlanje njengoba silapha nje KwaWosiyane, besizoshiya u-R5 million wokwakhiwa kwebhuloho okulindeleke ukuba libe seliphelile ukwakhiwa ezinyangeni eziyisi-6 ezizayo.
"Leli bhuloho elizokwakhiwa lapha lizosiza kakhulu abantu baseMangangeni njengoba bebethwala kanzima uma linile umfula ugcwele, bagcine bengasafinyeleli ezindaweni abasuke befuna ukufinyelela kuzona,” kusho uNkk Blose.
Uthi bazophinde bavuselele nezindlu eziselokishini lakule ndawo, iGlendale ezakhiwe ngendlela yakudala zaba ngamagumbi anekamelo elilodwa.
Lezi zindlu sezizoba ngamagumbi anamakamelo amane.