Kuqhume iqupha bebanga ukwakha isikole
Bathi babizwe ngamakhafula
SIMANZONZO isimo emuva kokuba kuhleshulwane ngequpha kwandiza igama lekhafula emoyeni ngenxa yombango osha phansi wokwakha isikole sabaphila nokukhubazeka, iPholela Special School, eNkwezela, eBulwer ngaphansi kukaMasipala iDr Nkosazana Dlamini Zuma, eningizimu yeKwaZulu-Natal.
Lolu dungunyane lusuke phakathi kwabaphathi benkampani eqokelwe ukwakha lesi sikole, iStefanutti Stocks, nosomabhizinisi bendawo, abangaphansi kwenhlangano eyaziwa ngelamaDelangokubona.
Lesi sikole sakhiwa ngo-R178 million.
Umbango uqale emuva kokuba amaDelangokubona emise umsebenzi ngeledlule ngoba efuna ukuhlomula ingxenye yomsebenzi ongama-30% njengoba ethi lokho kuwumthetho obhaliwe nasezincwadini zamathenda - ukuthi izinkampani ezinkulu ezenza imisebenzi ezindaweni ezehlukene kufanele ziqinisekise ukuthi ama-30% omsebenzi anikwa izinkampani zendawo ezincane.
AmaDelangokubona athi iStefanutti Stocks kayibanga nenkinga - njengoba nezibhalonyazi ( e-mails) abebethumelelana zona nayo ziwubufakazi besivumelwano abanaso nale nkampani - kodwa inkinga iqale emhlanganweni obungoLwesithathu ngeledlule.
Athi kufike insizwa emhlophe angayazi futhi ebingekho ngesikhathi enezingxoxo nabanye abaphathi benkampani.
“Ufike wabonakalisa ukungasihloniphi. Uqale ngokungafuni ukusitshela ukuthi ungubani igama lakhe maqede wasidelela ethi usengaze ahambe ibanga elide kangaka ecabanga ukuthi uhambela umhlangano obalulekile kanti uhambela nje umhlangano wamakhafula acabanga kancane.
“Uqale lapho-ke umhlangano ukungalawuleki. Uqhumise isibhakela kozwakwethu maqede wazishayisa odongeni wabe eseyovula icala ethi simshayile,” kuchaza uMnu Bheki Jali ongusihlalo wamaDelangokubona.
Uthi nabo bahambile bayovula icala lokubizwa ngamakhafula nelokushaywa.
Utshele ILANGA ukuthi abanye ozakwabo babenemihuzuko kwazise bekucaca ukuthi le nsizwa iyajima ngendlela ebibagingqa ngayo.
Ufunga uyagomela uthi ngeke kusetshenzwe ngokuthula kulesi sikole ngoba sebethole nokuthi kunezinkampani zakwezinye izindawo ezihlomulayo ngalo msebenzi wokwakha iPholela.
ILANGA lingakuveza ukuthi kuyimanje kuyaqhubeka ukuphazanyiswa komsebenzi esikoleni nakuba izisebenzi zakwaStefanutti Stocks zisebenza ziqashiwe. AbakwaStefanutti Stocks bakuqinisekisile ukuthi zikhona izinkinga ababhekana nazo kule ndawo.
Baphikile ukuthi omunye wabo uke wabiza osomabhizinisi bendawo ngamakhafula.
Umqondisi obhekene nemisebenzi yale nkampani, uMnu Ricky Ludick, uvumile ukuthi empeleni kunama-30% omsebenzi okufanele bawunike osomabhizinisi bendawo.
Utshele leli phephandaba ukuthi inkinga iqale emuva kokuba labo somabhizinisi bephinde bafuna ukuba ngama- supplier enkampani yabo, besebenzisa intengo ephezulu.
Uthe basazoqhubeka basebenzise umthetho ukunikezela ngama-30% omsebenzi kosomabhizinisi bendawo kodwa lokho bazokwenza besebenzisa ibhodi lesikole, okuyilona elizobanika osomabhizinisi bangempela hhayi abamaDelangokubona ngoba kabaziwa esigcawini somkhandlu wezamabhizinisi endaweni nasemkhandlwini kamasipala. Uqinisekise ukuthi ngeke kube nokuphazamiseka komsebenzi ngoba sebeqinise ezokuphepha.
Ibuzwa ngalolu daba imenenja kaMasipala iDr Nkosazana Dlamini Zuma, uMnu Nkosiyezwe Vezi, icele kukhulunywe noMnyango wezemiSebenzi yoMphakathi KwaZulu-Natal ngoba ithi isikole sakhiwa yiwona.
UMnu Mbulelo Baloyi, okhulumela lo mnyango, uthe nakuba belungakafiki kubona udaba kodwa bazoluphenya ukunqanda ukuphazanyiswa komsebenzi.
UColonel Thembeka Mbhele, okhulumela amaphoyisa KwaZuluNatal, ukuqinisekisile ukuthi amaphoyisa asesiteshini saseBulwer aphenya icala lokushaya kodwa bekungakaboshwa muntu.
Uqhumise isibhakela kozakwethu maqede wazishayisa odongeni...