Kusazoba nzima kubathengi
Uyantenga umnotho
ABATHENGI baseNingizimu Afrika bangase bazithole sebekhokha inzalo ethe xaxa uma beyoboleka imali emabhange akuleli emuva kokunye ukwehliswa komnotho wamabhange okwenziwe ngabakwaMoody’s.
Le ejenti ehlaziya isimo somnotho, yehlise amabhange akuleli esuka kuBaa2 aya kuBaa3, okusho ukuthi asesesigabeni sokugcina ngaphambi kokuba afinyelele kwesovucu.
Amabhange athintekile kulokhu kwehliswa, kubalwa iStandard Bank, iFirstRand, i-Absa Bank, iNedbank neInvestec Bank.
Kuzokhumbuleka ukuthi ezinye izinkampani ezihlaziya isimo somnotho, okuyiFitch neStandard & Poor’s (S&P) bona besebevele bewubeke ovucwini umnotho wakuleli. IMoody‚ kayigcinanga ngamabhange ngoba izolo silale isiyehlisele i-Eskom, iSasol, i-Airports Company of South Africa (Acsa) neMTN kuBaa3. Ngokusho kwesazi sezomnotho, uSolwazi Bonke Dumisa, ukubekwa kwamabhange kuleli zinga kusho ukuthi asezohlawula kakhulu nawo uma eboleka imali emazweni angaphandle okuzokwenza ukuba nawo enyuse inzalo uma ebolekisa ngemali. "Lokhu kakusho ukuthi amabhange ngeke esabolekisa ngemali kodwa uma abantu beboleka, bangazithola bekhokha inzalo eningi kunabebeyikhokha umnotho wamabhange ungakafakwa kwiBaa3 notch,” kuchaza uSol Dumisa.