Injabulo kukhunjulwa uLucky Dube
Indodakazi kaDube ikhala ngokunganakwa kwamaciko eReggae
UZWAKALISE injabulo engachazeki umculi waseNingizimu Afrika, uNkulee Dube, ngekhonsathi lokuhlonipha uyise, uLucky Dube, ozakhele udumo ngomculo we- reggae emhlabeni jikelele.
mULucky Dube odutshulwe wabulawa yimigulukudu zili-18 kuMfumfu (October) wezi-2007, akakaze ahlonishwe eNingizimu Afrika selokhu walala kobandayo. UNku-lee uzoba yingxenye yaleli dili le- reggae elibizwa ngeYoung Reggae Legends Against Abuse 2017 elizokuba se-Athlone Stadium, eCape Town, mhla zingama-24 kwephezulu elihlanganisa ukuhlonipha uLucky Dube, wukugubha inyanga yentsha nokulwa nokuhlukunyezwa kwabesifazane, yintsha, wukunklunklwa kotshwala nokusebenzisa izidakamizwa budlabha eNingizimu Afrika. Lihlelwe yiTHC Events SA.
UNkulee uzoqhulula amanoni kayise okubalwa kuwona iPrisoner, Together as One, Back to my Roots nawakhe okubalwa iLuv the Way, Who Dem - elekelelwa yi-Azania okuyibhendi yaseNyanga, eCape Town. Kuzobe kungokokuqala ecula eCape Town.
“Kuyangithokozisa ukuthi ekugcineni ngizocula eCape Town. Ngizizwa ngijabule ngendlela eyisimanga ukuthi ekugcineni ubaba uzohlonishwa yize ngibona ukuthi ekhaya kanginakiwe njengakwamanye amazwe. Kubuhlungu ukujatshulelwa kwamanye amazwe, uthole ukuthi abantu abakujabulelayo kabakuzwa ukuthi ucula uthini, kufanele ukuba baze batolikelwe ukuthi uthini,” kusho le ntokazi esihambe amazwe amaningi ngomculo okubalwa kuwona iGambia, Uganda, Swaziland, United States of America (USA), New Zealand ukubala ambalwa. Njengoba evame ukuya emazweni ahlukene, utshele ILANGA ukuthi sekunezinyanga ezintathu eseNingizimu Afrika.
Ukhalile ngokuvalelwa ngaphandle kwamaciko e- reggae kuleli. Mayelana nokuhlukunyezwa kwabesifazane - njengoba bebulawa ngapha nangapha kule mihla eNingizimu Afrika - unxuse ukuba abesifazane bagweme izindlela zasebusuku, baqaphele ngoba sekucacile ukuthi izinto zishintshile “sesizizwa singaphephile ngisho sisemakhaya”. URas Moses Kapa ongomunye wabahleli baleli dili lomculo, uthi inhloso wukuhlanganisa izingane zabaculi abadala abangasekho. Bazama nokuthola uBongani Fassie oyindodana kaBrenda Fassie - kwazise kungakubo eNyanga. Bazamile nokuthola indodana kaBob Marley, uDamian “Junior Gong” Marley obeseThekwini ngoNhlaba (May) kodwa usuku abebemfuna ngalo lwashayisana nezinhlelo zakhe. “Inhloso yeYoung Reggae Legends wukuhlanganisa izingane zomakadebona be- reggae kuleli nangaphandle kubalwa ezikaLucky Dube (Nkulee), uBob Marley (Ziggy, uDamian, Stephen, Julian), uJoseph Hill (Kenyatta) noPeter Tosh (Andrew). “Siyafuna ukubheka ngisho nangaphandle kwe- reggae njengoba sifuna uBongani, sithole izingane zabaculi ezisaqhubeka nabebekwenza. Kasifuni ukuba kube wumculo nje kuphela kodwa sifuna uku- khulisana nakwezomnotho, ezamabhizinisi nangokwempilo nje. Sifuna intsha izwakalise izwi layo ngomculo,” kusho yena. Utshele ILANGA ukuthi ibuhlungu into ebhekene namaciko e- reggae ngoba emincintiswaneni yezindondo nasemisakazweni ashaywa ngesithende kodwa bayazama ukubhekana nale ngwadla.
“Siyazama ukubuyisela i- reggae emincintiswaneni yezindondo, lokho sikwenza ngokuhlela amalidi omculo. I- reggae icula ngobumbano noxolo, uma ubheka izimo ezenzekayo namuhla ezweni, zikhomba ukuthi uthando noxolo luyadingeka,” kusho uRas Kapa. Uthe iYoung Reggae Legends ngeke kube yinto nje yaseCape Town kuphela kodwa bafuna iye eGoli naseThekwini kwazise iningi labaculi ababafunayo liyakuthanda ukuba sezindaweni ezahlukene. Ugqugquzele intsha ukuba ikhuthalele ukuba yingxenye yezomnotho. Abanye abaculi abazobamba iqhaza kwiYoung Reggae Legends yiRoots Rockers and Sons of Selassie, iJah Link, iWipe-Out, iGhetto Queen, uSister Zuki noDaddy Spencer. Amasango avulwe ngele-12 mini. Amathikithi abiza u-R100 e-computickets nasezitolo zakwaShoprite/Checkers. Izingane ezingaphansi kweminyaka eli-12 zingena mahhala.