Bakhathazekile abazali ngabafundi abacanasayo
Kusolwa ukuba ntekenteke kwabaphathi
KUSOLWA ukuthamba kwesandla sabaphathi esikoleni okubikwa ukuthi sesiphenduke kwampunz' edl' emini ngenxa yokungalawuleki kwezingane ezigcwala ngaphandle kwamasango kuze kushaye isikhathi sokuba zibuyele emakhaya zingakaze ziwubeke umcondo wazo emagcekeni esikole.
Umphakathi waseSantombe, eHarding, eningizimu yeKwaZulu-Natal, ukhala ngesimo othi kasisihle eCekeza High School njengoba izingane zenza umathanda. Kuthiwa zifika emuva kwesikhathi sokungena kwesikole zivalelwe amasango, zingabe zisafunda zibuyele emakhaya.
Umzali ocele ukuba igama lakhe ligodlwe, uthi kuze kushaye ihora lesi-9 abafundi begcwele umgwaqo. Utshele ILANGA ukuthi kwayena umphathi wesikole nelinye lamasekela akhe, bavame ukufika sekushaye ngisho isikhathi sokungena kwesikole, okwenza bangawuboni umonakalo owenzeka esikoleni.
Uthi okubahlukumezayo bengabazali, wukuthi isikole kasinawo umlando wokukhiqiza umatikuletsheni ophasa ngamalengiso kodwa kakufundwa. Uveze nokuthi kwabona laba abasuke bekwazile ukufika ngesikhathi esibekiwe, basuke bengenzi lutho.
“Isikole kasinawo umthetho oqinile futhi sizofa uma kuzoqhubeka kanjena. Lezi zingane zihlala ngaphandle kwesango kanti ezinye zigcwala ezitolo ngoba zisuke zivalelwe ngaphandle.
“Isikhathi sokungena kwesikole kasaziwa nhlobo kulesi sikole,” kusho umzali. Usihlalo wesigungu esilawula isikole, uMnu Phila Sikhosana, uthe akanalo ulwazi mayelana nesikhalazo sabazali esifuze lesi.
Ebuzwa ngezinsolo zokufika kwabafundi emuva kwesikhathi nokuthi kungani begcwala ngaphandle kwesikole ngesikhathi sokufunda, uthe usazokhuluma nothishanhloko ngaphambi kokuba enabe kabanzi ngalolu daba.
Imizamo yokuxhumana nothishanhloko kayiphumelelanga, ucingo lwakhe belukhala lungabanjwa kanti okhulumela uMnyango wezeMfundo KwaZulu-Natal, uMnu Kwazi Mthe thwa, uthe bayakugxeka ukungalandelwa kwemigomo ebekelwe othisha yokuthi kumele basebenze amahora amangaki.
Uthi bazokwenza uphe- nyo baxhumane nabahloli kuwona wonke amazinga ukuze kubhekwe lolu daba.
“Imfundo yomntwana yiyona ebalulekile, uma sithola ukuthi ziyiqiniso lezi zindaba, kuzophoqa ukuba sithathele othisha izinyathelo,” kusho uMnu Mthethwa.
Lezi zingane zihlala ngaphandle kwesango kanti ezinye zigcwala...