ZIBAKHALELE "ABABULALA" UMFUNDI ENYUVESI
BALAHLWE ngelakubo abasolwa abebefuniswa okwembuzi yokwenza umsebenzi ngamaphoyisa aseMpangeni, enyakatho-mpumalanga yeKwaZuluNatal, ngezinsolo zokubulala uMnu Frank Sithembiso Chirwa (27) - obefunda e-University of Zululand, KwaDlangezwa - mhla zili-15 kuMfumfu (October) nyakenye.
Abasolwa kuthiwa badubulane endaweni yokucima ukoma eVryheid, enyakatho yeKwaZulu-Natal, ngempelasonto, okuphoqe ukuba omunye aye esibhedlela, okuyilapho zimkhalele khona kanti omunye uboshwe esipotini.
UFrank ubulawa nje ubenza unyaka wokugcina kwiBCom Banking and Economics, udutshulwe ehleli nomngani wakhe befunda belungiselela ukuyobhala.
Abasolwa, okunguMnu Khanyisani Khumalo noMnu Nkanyiso Mkhwanazi, bavele kafushane eNkantolo yeMantshi yaseMthunzini ngoMsombuluko icala labo lahlehlela inamuhla ngoLwesine njengoba kulindeleke ukuba bafake isicelo sokuthola ummeli wamahhala.
Kubikwa ukuthi uMnu Mkhwanazi udubule uMnu Khumalo ethi udubula owesilisa wasendaweni oshaye uMnu Khumalo ngebhodlela ekhanda emuva kokuqubuka kwengxabano.
UMnu Khumalo kuthiwa uphuthume esibhedlela saseVryheid. Kuvela ukuthi uMnu Mkhwanazi zimkhalele endaweni yokucima ukoma kwathi uMnu Khumalo zamkhalela khona esibhedlela.
Uyise kaFrank, uMnu Blessing Chakwela Chirwa, utshele ILANGA ukuthi indodana yakhe ibiwusizo olukhulu kwabanye abafundi futhi ikhaliphile.
“Indodana yami ibulawiswe okwenja, ngisola umona ngokubulawa kwayo ngoba emuva kokuba idutshuliwe, abasolwa bathathe umakhalekhukhwini kuphela bashiya izimpahla nonyanyavu lwemoto, iBMW.
“Ngijabule ngokubanjwa kwalaba basolwa yize indodana yami ingeke isavuka kodwa nginentokozo emoyeni wami, sengizokwazi nokulala ubuthongo. Ngibonga ukusebenza ngokuzikhandla kwamaphoyisa. Ngibonga noNkulunkulu ngokuphendula imithandazo yami,” kusho uMnu Chirwa.