UBOPHA UMNYANGO OSHADISWE NOWOKUFIKA
UFAKA uMnyango wezaseKhaya enkantolo ummeli wowesifazane waseLindelani, enyakatho yeTheku, emuva kokwehluleka kwawo wukukhipha ubufakazi obuqinisekisa ukuthi ikilayenti lakhe lishade nowesilisa okuvela ukuthi udabuka eNigeria.
UMnu Elliot Nzama wenkampani yabameli, i-E.P & Associates, utshele ILANGA ukuthi lolu daba ulufaka eNkantolo eNkulu yaseThekwini ngoba umnyango wehlulekile wukuveza ubufakazi obuthi “uNkk Ntokozo Taiwo” (37) ( osesithombeni), ushade noMnu Adebayo Taiwo, ngowezi-2007.
Kulindeleke ukuba icala lingene kule nkantolo mhla zili-10 kuNcwaba (August).
ILANGA libikile phambilini ngoNkk Taiwo - ofike emahhovisi eLANGA ngoNhlolanja (February) ekhala ezimathonsi, ecela usizo mayelana nale nkinga - ethi ushade nowesilisa angamazi.
Uthe ngoZibandlela (December) wezi-2007, uye kwandabazantu oNdini eyokwenzela kabusha indodana yakhe, uNkosinathi Ndlovu (18), isitifiketi sokuzalwa ngoba esidala silahlekile.
Ufike khona wathola ukuthi ushade noMnu Taiwo. Uthi uvele waphithana ikhanda uma ezwa lezi zindaba ngoba yena akaze ashade.
Utshele leli phephandaba ukuthi ulahlekelwe wumazisi ngowe2006 kwesinye sezitolo eThekwini manje usola ukuthi umuntu owutholile nguyena owenze lokhu.
ILANGA linaso isitifiketi somshado kaNkk Taiwo, kasinazo izinombolo zikamasizi kaMnu Taiwo, isigxivizo soMnyango wezaseKhaya oNdini siveza ukuthi isitifiketi sikhishwe mhla zili-10 ngoZibandlela wezi-2012 kanti umshado wona sithi ubumhla zingama- 26 kuMasingana (January) wezi-2007.
“Ngiyethemba ukuthi le nkinga izolungiseka njengoba isizoba sezandleni zenkantolo. Sesiside isikhathi ngiphila impilo engamanga, ngishade nomuntu engingamazi.
Le nkinga isikapakele ngisho nasezinganeni zami ezimbili njengoba zingenazo izitifiketi zokuzalwa. Ngeke ngikwazi ukuzishayela izitifiketi zesibongo engingasazi. Ngingajabula uma le nkinga ingalungiseka ngisaphila ngoba umndeni wami uzoba nenkinga uma ngishona ngibiza lesi sibongo,” kusho uNkk Taiwo.
UMnu Nzama utshele ILANGA ukuthi uzoyilwa le mpi ukuze kufike esiphethweni.
“Ngifuna umnyango ungivezele into ebhaliwe futhi etshengisayo ukuthi uNtokozo ushadile noMnu Taiwo,” kusho uMnu Nzama.
Okhulumela uMnyango wezaseKhaya kuzwelonke, uMnu David Hlabane, ucele ukuthunyelelwa imibuzo ngobhalonyazi (e-mail). Kuthe uma esethunyelwe bathi balutholile, bazophenya bese beyaphendula.
phumelela@ilanganews.co.za