UKUKHULA KWEZIKAMOYA KUYABAHLUKANISA ABANTU
1 KWABASEKORINTE 13:10-11
NAMUHLA ake ngikhulume ngalokhu esiyikhona kuNkulunkulu ngendlela iBhayibheli elisho ngayo uma licacisa ngathi. Kuningi esibizwa ngakho kulona, kodwa namuhla sibheka lokhu kokubizwa ngabafundi beNkosi uJesu.
Kuleli gama elithi singabafundi beNkosi Jesu yilapho kumele sicacelwe khona ukuthi endleleni noma empilweni yokukholwa, impilo yethu incike ekufundeni izinto zikaNkulunkulu usuku nosuku, kusukela emazingeni aphansi kuze kufinyelele emazingeni aphezulu.
Uma sisekukholweni sisuke sisemfundweni yezinto zasezulwini. Ngesikhathi uJesu ethuma abafundi bakhe wabatshela ukuthi mabashumayele, babhaphathize bese befundisa abantu ukugcina konke ayebayale ngakho.
Lokhu kusitshela ngokusobala ukuthi umuntu akagcini ekuphendukeni nje kuphela, kodwa wedlulela nasekufundisweni ukugcina konke. Imfundo yethu iyafana nefundwa emhlabeni ngokwamazinga afundwayo, kusukela kwapha- nsi kuze kube kwaphezulu. Umehluko kuba yizinto ezifundwayo ngoba thina sifunda izinto zikaNkulunkulu ngendlela eqondene nokukholwa kwethu.
Evesini le-10 kule ncwadi esifunde kuyona namuhla, sivezelwa ukuthi nxa sekufike okupheleleyo, lokho okuyinxenye kuyakukhawuka. Ngamanye amazwi umuntu uba sentweni engaphelele ngoba ingakafiki epheleleyo.
Akabe esatshelwa muntu ukuthi makasuke kwengaphelele uma sekufike ephelele ngoba engaphelele iye iziphelele ngokwayo. Evesini elilandelayo kucaciswa ukuthi uma usengumntwana ukhulumisa okomntwana, uqondise okomntwana, udlinzise okomntwana.
Uma usuyindoda uyakuyeka okobuntwana. Kuneqiniso okufanele singakubalekeli ukulikhuluma, lokuthi ingane ifundiswa ngumuntu oyifunde kuqala leyo nto azoyifundisa yona.
Kakulungi uma uthisha enolwazi olungaphansi kolomntwana noma nxa lulingana nolomntwana. Nasekukholweni kunjalo, kakulungi uma uzobeka impilo yakho phakathi kwabantu asebegcinile maqondana nokufunda izinto zaphezulu.
Kuze kuphoqe ukuba nehlukane ngokuthula bese wedlulela kubantu abanezinto ezingaphezulu kwalezo onazo ukuze uqhubeke nokukhula kwezikaMoya. Akuve kubuhlungu ukuchitha isikhathi sakho phakathi kwabantu abangakhuli ngoba lokho kudala ukuba nawe ungakhuli.
Kuyenzeka kuvele kukhule abantu abasetshenzwayo baze badlule obasebenzayo, okwenza abanye ukuba uma bengasatholi lutho olubakhulisayo lapho bekhona, bavele bakhethe ukuphuma bazifunele enye indawo abazokhula uma bekuyona.
Kalikho ikhambi lokwelapha lesi simo ngaphandle kokuba kukhuthazwe abasebenza ibandla ukuba bangazithambisi kodwa ba- kulwele ukuthi bona uqobo bazikhulise ngolwazi oludingwa ngabafundi beNkosi uJesu ababekwe ezandleni zabo. Kakulula abantu badlulele phambili uma nje kuwukuthi bayayithola into abayidingayo lapho besuke bekhona.
Kufanele uhlakaniphe uma kukhona into ongenayo, ngokuba ulande labo etholakala kubona ukuba bayiyise kubantu abasetshenzwa nguwena. Ngalokho ugwema ukuba abantu bangaze baziphumele ngokwabo beyofuna lezi zinto ezingatholakali kuwena.
Kule ngosi ngikhuthaza kakhulu abasebenza ibandla ukuba bangazithambisi ekuzikhuliseni bona uqobo ukuze bakhulise ibandla lingaze liziphumele ngokwalo liyokhuliswa ngabanye abantu ngoba zingekho izinto zokulikhulisa lapho likhona. Nokukhuluma izinto zikaNkulunkulu kuyakhula, uma ungakhuli ekukhulumeni kwakho kodwa uphindaphinda izinto ezizodwa futhi uzikhuluma ngendlela efanayo nsukuzonke, kunomphumela omubi wokushiywa ngabantu sebekhathele wukulalela into eyodwa kodwa sebefuna ukukhuluma okuzobakhulisa.
Uma udinga ukukhula kwezikaMoya, yehlukana nabantu abangazimisele ngokukhula ngoba bazokulibazisa. Ukukhula kwakho kuncike kubantu abakhule ngaphezu kwakho kwezikaMoya futhi asebehambe ibanga elingaphezu kwelakho ukuze bakudonsele lapho sebehambe baze bafika khona.
Ungachithekelwa yisikhathi phakathi kwabantu ongakhuli uma uphakathi kwabo.
*Lalela uDkt M.S. Mncwabe kwiNANDA 88.4 FM ngeSonto ngo-6-9 ebusuku ohlelweni “UBIZO LWAKHO”. Utholakala kwethi: 072 320 1773. Calling Promotions Ministries 176 Pixely kaSeme (West Street) Durban
Kakulungi uma uthisha enolwazi olungaphansi kolomntwana noma nxa...