MAKUYEKWE UKUKHOHLISWA ABANTU NGE-DA
MHLELI: Umthethosisekelo we-1996 uthi wonke muntu ukhululekile ukuba azikhethele iqembu lepolitiki alithandayo ngaphandle kokwesatshiswa. Kukhona intimboti ekhulunywayo kuthiwe uma uvotela iDemocratic Alliance (DA) uvotela abelungu abanobandlululo. Njengaliphi iqembu esingathi kalinalo ubandlululo?
Ingani ubandlululo yinkinga yomhlaba wonke. Yona kanye futhi le ntimboti ibuye ifakazelwe wukucabanga kubuywe eduze kungadeshwa, kuthiwe uma kungaphatha iDA kuyobuya ubandlululo. Luyobuyiswa ngubani, kanjani ubandlululo?
Ingalubuyisa kanjani ubandlululo ibe ifuna ivoti kubantu? IDA kayivulele ubulungu kubelungu bodwa kodwa yemukela zonke izinhlanga, ngokwehlukana kwazo. Yize abelungu bebaningi kwiDA kodwa ngeke badlule lezi zinhlanga ezinye.
Uma umlungu ejoyina i-ANC kuba sengathi wenze kahle, uyingelosi bese eba wuLusifa uma eya kwamanye amaqembu. Onhlabathi, okhulukhulwane nokhokho bobandlululo yiNational Party (NP) yowe-1948 kodwa ngenxa yokuthi yagwinywa yi-ANC, manjeke yabe isingcweliswa yabhajadiswa ngomoya omuhle wakwa-ANC. Buka umholi wokugcina weNP, uMarthinus Van Schalwyk, waze wagixatshezwa ngesikhundla sokuba ngungqongqoshe kuhulumeni oholwa yi-ANC ngoba ethwale ngesiqabetho iqembu lokhokho bakhe waliyisa kuyona.
Ngiyavuma, kukhona abanye abelungu beNP abajoyina iDA besuka kuyona emuva kokuba ishade ne-ANC kodwa hhayi bonke. Masiyeke ukudala uqhekeko ezinhlangeni ngoba lesi yisikhathi sokuba kuhlanganiswe izinhlanga ezahlukene zalapha eNingizimu Afrika njengoba ongasekho ubaba uNelson Mandela ayekuhlosile futhi ayekufisa lokho. Yisemkhulu Nzimande, EPORT SHEPSTONE.