IZESHELI BEZIBAHLONIPHA OMAME
SENGIKE ngikhumbule indlela abesilisa bakudala abebemhlonipha ngayo umuntu wesifazane osethe ukuqina bese ngiqhathanisa nala mabhobhodleyana amanje ngithi webabo! Kangifuni nokuyiphatha eyobaba ngoba leyo isobala. Ngibuka nje ukuthi lokhu okungabafanyana kwamanje kuzenza ukuthi kungosiyazi abangadinge kutshelwa nakuyalwa. Kakwenqeni ukufaka izandla emakhukhwini, kusho ngebhulukwe elitebhisile, kupepenyeke nentombi kube kumbona kahle umuntu omdala eza eyohlangana nakho.
Kudala ubungeke ukubone lokho. Mangisho nje ukuthi kakukhathalekile ukuthi ukhuluma ngokweshela komjolo ezindleleni kubuywa ezikoleni okanye wukweshela lokhu kwangempela kokumisa iduku, iqiniso limile: umame ubehlonishwa futhi ebalekelwa.
Uma usuyiqhumamponjwana bekwenzeka uphuma esikoleni nje kanti okungabafana sekuqalile ukuzidlisa satshanyana bese kuqhamuka umama thizeni, hho ngiyakutshela! Bewuphakamisa izinyawo, uhambe sakukhwabuzela uzama ukugqagqana nalo mfana oyisimbelambela sesesheli ngoba kawufuni kubonakale sengathi uchebekenyeka nabafana endleleni, hleze lo mame akucebe kunyoko ekhaya, kushe isibhaxu.
Okuhle-ke wukuthi noma ngabe kawumazi okwangempela lowo mame, ngenxa nje yokuthi mdala kunawe lo muntu enizohlangana naye, bekuba yiso leso, uqaqe njejubane ubaleka.
Ngicabanga ukuthi le nto yokuba negama elihle endaweni beyaziswa kakhulu ngezikhathi zethu zamzukwana futhi-ke negenge yabesilisa beyizazela ngoba uma sewushilo ukuthi nangu umuntu omdala eza, makasuke eduze kwakho, ubenzenjalo umfana - ubengahongi neze. Ubenyobozela, azenzise ubala ezama ukuziba kuze kube uyedlula lo mame, naye adlule enesithunzi nokuzigqaja bantu ebona ehlonishwa, hhewu.
Kangazi noma ziyakuqonda yini izingane zanamuhla ukuthi kumnandi kanjani ukuhlonishwa yizingane uma umdala, zikunike indawo yakho, kusho kuthi cosololo. Kusuke kungekhona ukuzicabangela wena siqu, uyaye ubuyelwe yithemba ngekusasa lesizwe nomphakathi jikelele ukuthi uma sisenezingane ezihlonipha kanje noma sezibhadanywe zisephutheni, cha hhayi kusho ukuthi sisazoba yisizwe esiphumelelayo nangomuso. Hhayi la mahlongandlebe adludluthekayo nje naphambi kwabantu abadala.
Kuyashelwana noma kuqonyenwe, sekuze kuxhagenwe nangocikicane, aqhamuke lapho umuntu omdala kufane nokuthi kakwenzeke lutho. Nasekweshelaneni lokhu kokumisa iduku, kuqonywane umgangela, ubehlonishwa umuntu omdala. Ake sithi nje intombi iphuma esitolo nasi isesheli sakwaMkhize eMpangeni, siyibonile intombi sayilandela, sesiyeshela-ke phela, sicela impahla yaso entombini - okuwucu noma isipeletu. Uma kuke kwaqhamuka umame wendawo, isesheli besiyaye sithi thintinini sakuzithiba, sihoshe izinyawo. Babingelelane omame nentombi babuzane impilo, bahlukane kube yima insizwa ikekela izama ukulandela iyoqhubeka ibeke amazwi entombini. Lapho isifile ngamahloni insizwa ngoba kayifuni ukwaziwa kabi endaweni njengomuntu okhuliswe kabi nongahloniphi kepha ngenxa yokuthi ukweshela emini ilanga libalele futhi weshelela izinhloso ezinhle zokuganwa kuyinto enhle, cha iqhubekeke yeshele. Bewungeke uyibone nje idlwathuzela insizwa iqhubeka yeshela kube sekuqhamuke umuntu omdala kunayo nentombi le eyeshelwayo.
Kufana noma ithe iyokweshela emfuleni kanti kunomama lapha bayageza, bayawasha noma bayokukha amanzi, ibihoba nje noma ime laphaya buqamama kuze kube wukuthi izinto ziyahleleka sekungesheleka.
Ngenhlanhla bekujwayele ukuba kube yizintombi, ngomakoti nezingane emifuleni, omama bebengabi baningi ngoba amadodakazi asekhulile kanti namadodana aseganiwe yinaba omakoti, ngakho-ke uma insizwa seyisibonile isesheli sayo futhi yacwaninga yabona ukuthi ngomakoti laba enabo emfuleni - kakubona abantu abangomama kuyona - ibikhululeka yeshele nje phambi kwabo.
Okunye obekugqamisa inhlonipho yensizwa wukuthi uma kwenzekile yeshela kabana - njengokuthi ivimbele intombi endleleni zaze zafike zasho ekhaya lezi ebihamba nazo ukuthi nangu uNozibanibani evinjelwe yinsizwa emeshelayo endleleni - bebeyaye baphume omame bamemeze igama lentombi, babuze ukuthi ngowakobani lowo mbhemu oyilibazisile bese imceba-ke nayo ukuthi uyiphuca izinto zayo. Umame sekumele athethe-ke, azenze umuntu odiniwe ofuna ingane yakhe la, bese insizwa ivalelisa entombini, idede endleleni-ke inyobozele ihambe. Isiyobuya ngelinye ilanga iyokweshela futhi kuze kube iyaqonywa noma intombi ikhombe kwenye indawo la izomisa khona iduku.
Ngibala le nsumansumane ende kangaka ngoba ngibona indlela le ntsha yethu engasenamahloni ngayo. Ngike ngaya komunye umngcwabo la intombazane yakhona esencane beyikhulelwe, uyabona nje ukuthi cishe ubesafunda lo muntu manje ngebhadi kwashonwa lapha ekhaya. Akanalo nelincane ihloni usisi omncane, uqhunsule lesi sisu sakhe ugqoke isikibha esimsondela thaqa, enjalo nje kakuvumi ahlale phansi, uyaphuma uyangena la etendeni.
Ewu, ngisho noma ngabe wawungumshadikazi wawungaziqhenyi nje ngesisu sokukhulelwa bakwethu, wawugqoka kahle uhloniphise, kubukeke kugqibekile, ikakhulukazi uma ube nebhadi lokuthi kwaba nomcimbi noma nesifo kini ungakateti.
Empeleni nje, kweminye imizi unyoko uyakuthatha ayokufihla ezihlotsheni uma kuzofika izihlobo zomndeni, hhayi ngoba ekuvuna kepha ukuze ungamtheli ngehlazo ukwedlula lokhu osuvele ukwenzile kokukhulelwa umncane, ungashadile. Pho-ke sizothini ngoba izwe selafa. KwiLANGA LangeSonto ngizoxoxa ngokuthi beyenziwani insizwa engahloniphi neyeshela ngendlakadla. UThobile Nxumalo nguMhleli oMkhulu weLANGA. Ungaxhumana naye ku: Thobile.Nxumalo@ilanganews.
co.za noma editor@ilanganews.co.za. Ukhona nakuFacebook: Thobile Nxumalo, kwiTwitter: @ ThobileNxumalo nakwi-Instagram: nxumalo_r_nxumalo