KUYICALA UKUNCOKOLA NGOKUTHUNAZA OMUNYE EMSEBENZINI
UKUBA namancoko emsebenzini yinto enhle kakhulu kangangokuba kwenza ukusebenza kube mnandi futhi kusebenzeke ngendlela ethokozisayo.
Nakuba kuyinto emnandi ukuncokola kodwa kumele umuntu aqaphele ukuthi kwesinye isikhathi okukuhlekisayo kungenzeka kungamhlekisi omunye. Kokunye kuyenzeka ukuba lokhu okuthatha njengehlaya kuyicala elibi kakhulu endaweni yokusebenza.
Amazwe amaningi anemithetho eqinile ehambisana nokuvikela izisebenzi ikakhulukazi lezo eziphila nokukhubazeka noma ezesifazane ukuba zingahlukumezeki nanoma ngabe iyiphi indlela emsebenzini.
Ukuncokola ngendlela ethunaza isithunzi somunye emsebenzini kungaba yicala elibomvu kwesinye isikhathi kungaholela ekubeni ibhantshi ligcwale umoya. Ngokusho kuka-Eugene Volok onguSolwazi wezoMthetho e-UCLA School of Law okusho ngomlomo emsebenzini kungathathwa njengendlela yokuhlukumeza uma kungehlanga kahle kuzakwenu.
Amancoko angaba yingozi endaweni yokusebenza kubalwa lawo athinta inhlamba, ubuhlanga, ubuzwe, ucansi, iminyaka, ukukhubazeka okubalwa nesimo sokukhuluphala noma sokuncipha komzimba kukazakwenu, ipolitiki, ukuthandana kobulili obufanayo, isici nokunye okuphathelene ne
ndlela uzakwenu abukeka ngayo.
Kubalulekile ukuba ngaphambi kokuthi wenze ihlaya nozakwenu uqaphele isimo akusona ngoba kuyenzeka ukuba ihlaya alithokozelayo ngelinye ilanga lingehli kahle kwazise ubhekene nezinye izinkinga ezingaphathelene nomsebenzi bese lifika ngenye indlela.
Okunye okubalulekile wukubheka ubudlelwano bakho nabanye ozakwenu osebenza nabo. Kuyenzeka ihlaya lamukeleke uma lizoshiwo nguzakwenu onobudlelwano obuhle naye kodwa kuthi uma lishiwo ngomunye lingehli kahle bese kusuka ingxabano emsebenzini.
Kunamagama abanye ozakwenu emsebenzini abangabizana ngawo kodwa uma omunye uzakwenu ekubiza ngalo ungalamukeli ngoba kanijwayelene ngaleyo ndlela.
Kuyenzeka ukuthi uzincokolele kanti ususho into ephambene nomthetho wezezisebenzi nokuyinto engangcolisa igama lakho noma elomunye uzakwenu. Kubalukile ukuba endaweni yokusebenza uncokole ubuyele nganeno ukuze ungazitholi usunyathela abanye ozakwenu amakhona.
Khumbula ukuthi indawo yokusebenza ihlanganisa abantu abaqhamuka ezindaweni futhi abakhuliswe ngezindlela ezahlukene. Qikelela ukuthi kunoma yiliphi ihlaya olishoyo emsebenzini lihambisana nokuqoqeka kolimi nenhlonipho.