UMA UHWEBA SEBENZISA INKAMPANI EGUNYAZWE YI-FSB
KULE nyanga yabantu abasha ngizoke ngigxile kancane emibuzweni esengiyizibe isikhathi eside emayelana nezinkundla zokuhweba ngemali ezitholakala kwi-internet ngoba iningi inkohlakalo eyenzekayo kulezi zinto.
Okokuqala nje, angikhulume ngenkampani okuthiwa ingeyaphesheya esiza abantu balapha eNingizimu Afrika ukuba bakwazi ukuthenga amasheya ezinkampani zaphesheya nokuhweba ngemali yamazwe omhlaba.
Isaziso esikhishwe yiFinancial Services Board sithi le nkampani egcwele kuFacebook ebizwa ngokuthi yiFinancika ayikho emthethweni kanti futhi kunokwenzeka nokuthi idayisela abantu amasheya mbumbulu ngoba ku- ngathi ayigunyaziwe nangasezweni layo. Maningi amathuba okuthi abantu bahweba emoyeni entweni evele ingekho.
Abantu abasha balutheka kalula ezintweni ezithinta imali ngethemba lokuthi kukhona abazokuzuza ngokushesha kanti akunjalo.
Izinto ezithinta imali kumele zilandele umthetho wale mboni. Baningi abantu bengibuza mayelana nale nkampani kodwa ngingenalo ulwazi.
Kodwa-ke ngoba uFSB usesixwayisile ngayo kumele abantu baqaphele.
Le mboni ethinta ukuhweba kusetshenziswa ezobuchwepheshe ayilawuleki kalula ngoba ubuchwepheshe buyashintshashintsha sonke isikhathi.
Uthi usabambe lokhu kuvele kuqhamuke okusha nakho osekumele kube khona indlela yokukunqanda.
Kudala abantu belahlekelwa yizimali kulezi zinto ezivele zinyamalale ngokuvaleka kwe- website sekuphelile njalo.
Uma unothando lokuhweba ngokusebenzisa ubuchwepheshe besimanje kumele usebenzise inkampani egunyaziwe yiFSB ukugwema ukulahlekelwa yizimali.
Khumbula ukuthi imboni yezokuhweba inobungozi obukhulu bokulahlekelwa yiyo yonke imali oyifakile.