Uthembisa ulozolo kwiJazz Extravaganza
UMCULI we-jazz uthi iTheku liyafa yindlala yamafestival alolu hlobo lomculo. UThandi Ntuli oyi- pianist uthi baningi abantu abathokozela ijazz KwaZulu-Natal kodwa abagcina sebezithola bencisheka lo mculo. Njengoba kuzoba khona i-International Jazz Extravaganza mhlaka-17 kule nyanga uthi baningi abazozitika ngalo mculo.
“Ngesikhathi ngikhipha i- album yami yokuqala ngathola ukuthi iningi labalandeli bami liseThekwini ngoba ama- order bengiwathola khona kakhulu.
“Ebengikuqaphela futhi wukuthi kaziziningi izindawo zabaculi be-jazz abadlala bukhoma kuzo. Iningi liyathanda ukweseka lo mculo kodwa ngenxa yokushoda kwezindawo zokudlala kuba nzima.
“I-jazz inabalandeli abaningi - cishe sonke sikhule silalela obaba uCaiphus Semenya noHugh Masekela,” kuchaza uThandi.
Le ntokazi esencane ithi ziningi izinkinga ezisabhekene nomkhakha we-jazz.
UThandi uthi njengoba engumuntu wesifazane kuyenzeka kwesinye isikhathi kube nabantu abangalethembi ithalente lakhe kule ndima yize kuyinto engenzeki ngaso sonke isikhathi.
“Kwibhendi yami ngisebenza namadoda wodwa kodwa angihlonipha ngale ndlela exakile. Akusiyo into engahlala phansi ngayi- cabanga ukuthi ngifisa ukusebenza nabo kodwa kwazenzekela ngoba indlebe yami isemculweni kakhulu. Abantu engisebenza nabo ngabantu engihlangane nabo ngesikhathi ngimatasa nomculo,” kusho uThandi.
Ugcine ukukhipha i-album ngo2014 eyabe isihloko esithi “The Offering”, yaqokwa kumaMetro FM Award. Uthi uthando lwakhe lomculo luqale esemncane.
“Umculo yinto esuka emndenini. Umama ubengumuntu othanda umculo wamakhwaya, nami wagcina esengifaka esikoleni sokudlala u- piano.
“Kuthe uma ngiqeda isikole ngaba wumuntu othanda ukubhala umculo ngabona kukuhle ukuba ngigxile kwi-jazz,” kusho yena.
Useke wasebenza nabantu noThandiswa Mazwai, uNeo Muyanga, uSteve Dyer, uQB Smith, iThe Brother Moves On, uSir LSG, uBheki Khoza, Siya Makuzeni nabanye.
Kulo nyaka uThandi uhlose ukubuya nenye i- album ngasekupheleni konyaka uthi abazobe beyingxenye yeJazz Extravanza ezobe iseNkosi Albert Luthuli Convention Centre bazoba nenhlanhla yokuzwa izingoma zakhe ezintsha.
“Cishe zonke izingoma zami ezintsha bazozizwa nalezi abazithanda kule album edlule ngizozicula bukhoma. Abantu baseThekwini mabaphume bazozidelisa ngomculo,” kuphetha uThandi.