NABESILISA BANGADLISA NGEMIBALA KWI-VDJ
NABESILISA bavumelekile ukudlala ngemibala eshintshayo kwiVodacom Durban July yanonyaka. Lokhu kudalulwe usomfashini osezakhele igama ngokugqokisa inqwaba yosaziwayo, osomabhizinisi nongqongqoshe imbala, uThula Zaca onesitolo esibizwa ngeImage Collezion.
UZaca uthi kubalulekile ukuba nabesilisa bahambisane ne- theme yemicimbi abamenywa kuyona. Uthi kuvamisile ukuba abesilisa uma bemenyiwe bamane bazigqokele amasudi nje kuphela bangabheki ukuthi ayahambisana yini nemicimbi abamenywe kuyona.
Uqhuba athi njengoba kuza iVDJ abesilisa okuyibona agxile ekubagqokiseni bajwayele ukufika sekusondele umcimbi bese bethatha noma yini.
“Kuhle ukuba bazinikeze isikhathi sokubheka izimpahla abazozigqoka ngoba uma sebefika sekusondele umcimbi bathatha noma yini bagcine sebephuma eceleni,” echaza.
UZaca uthi kule minyaka eyi-9 egqokisa abantu ubuye abeluleke ngemfashini ekhona ngaleso sikhathi ukuze babe semgangathweni.
“Abantu besilisa besimanje kabasafani nangesikhathi esedlule. Nabo bayakuthanda ukubukeka beyizincwasimende futhi befanelekile uma begqokile,” esho.
Wengeze ngokuthi unamakhasimende aqhamuka ezindaweni ezahlukene eNingizimu Afrika futhi iningi lawo likhonze amasudi awathengisayo iningi lawo aqhamuka phesheya kwezilwandle.
“Nakuba ngisezinhlelweni zokwethula i- label yami ezobizwa nge-Image Collezion kodwa kuyiqiniso elingephikwe ukuthi abantu basazifela ngengqephu eqhamuka emazweni afana no-Italy, Turkey naseFrance,” kusho yena.
Uthi uzosebenzisana nabasiki bengqephu bakuleli kodwa esebenzisa indwangu yaphesheya kwezilwandle ukuze izimpahla zakhe zibe sezingeni eliphezulu. UZaca oke wasebenzela izinkampani ezahlukene emkhakheni wezokumaketha uthi uyazikhangisela izimpahla zakhe futhi uyazigqaja ngebanga aselihambile kusukela eqale ukuthengisa ngezimpahla zokugqoka.
“Nakuba ngimatasa unyaka wonke kodwa isikhathi seVDJ yisona esiphithizela kakhulu. Ngikhuluma nje sengibalindele nezimpahla ezizobe zihambisana nayo i- theme yeVDJ futhi ezisezingeni eliphezulu,” kusho uZaca.