ITHUBA LENZUZO ENTSHENI YASEMGUNGUNDLOVU
KUZOSIZAKALA abemikhakha ehlukene emculweni abanentshisekelo yolwazi ngokwenzeka kuleli bhizinisi ohlelweni lwalo nyaka lukaSiyanda Makanya odume ngelikaDJ Kabila.
Lo DJ osekuphele iminyaka ekule mboni, nohamba ngesihlalo okuyinto engajwayelekile embonini yomculo unohlelo olwaziwa ngeleMusic Will Save The Day noselusenyakeni wesihlanu kulokhu.
Nakuba edabuka eMtata e-Eastern Cape uthi uthando aluthola KwaZulu-Natal ikakhulukazi eMgungundlovu yilo olumbeka eWinston Churchill Theatre mhlaka-23 kwephezulu nase-033 Life-style ngakusasa mhlaka-24.
EWinston Churchill kuzoba neworkshop yamahhala yokucija abathanda umculo nokuzobe kuqala nonyaka. Phakathi kwezihloko athi zizodingidwa ngesePublishing and Distribution, Music Development, Brand Building and Management, Media and Entertainment, PR and Marketing, Festivals and Live Events neseLegacy.
Phakathi kwezikhulumi kunezimnkantshubomvu okunguKgolo “Da Guru”, King Sfiso weGagasi FM, Kudo Skelm waseSoul Candy, Culoe De Song nabanye. UZola Zeelovin weGagasi FM uzobe ephethe uhlelo kanti kuqalwa ngehora lesi-8 ukubhalisa. Ngakusasa e-033 Lifestyle kulindeleke ukuba kuhlehle ufishi njengoba kuneziteji ezimbili zoDJ ngokwehlukana komculo abawudlalayo nezihlukaniswe ngokuthi yiDigital ne-Analogue.
Kwabazobe bewaklwebha amapuleti nguye umnikazi wendaba, uCuloe De Song, Ralf Gum, Claude, Brewed Souls, King Sfiso, Bubbles, Bright Soul, nabanye.
Uthi le workshop uyihlele ngoba igenge ihlale imkhalela eMgungundlovu uma eqashiwe. Abaningi bakhala ngokungabi nalo ulwazi ngokumele bakwenze ukuze umculo wabo uvelele nokwenze walanda lezi zikhulumi.