Imchithile inkantolo obegweve nesidumbu
Uzame ukucela intethelelo
UGCINE engcwatshwe ngumndeni wakhe owesilisa waseNzalabantu, KwaMbonambi, enyakathompumalanga yeKwaZulu-Natal, odutshulwe wabulawa ezodabula incwadi yomshado nomkakhe ngakusasa emuva kokuba umngcwabo wakhe ubhuntshile inkosikazi igweve nesidumbu.
Iphelile injabulo kuNkk Happiness Mbuyazi, uMaNtuli, echithwa yiNkantolo eNkulu yaseThekwini esicelweni sokungcwaba isidumbu somyeni wakhe, uMnu Mandla Mbuyazi, abesehlala ngokwehlukana naye emuva kokuba kuthiwa umbambe oqotsheni ezitika ngocansi neshende eliyiphoyisa futhi eliwumakhelwane ngowezi-2014.
Umngcwabo bekufanele ube mhla zizine kwephezulu kodwa wabhuntsha ngenxa yokuthi kuthiwa uMaNtuli ufike nabakubo ephethe incwadi yenka-ntolo evimba abakwaMbuyazi ukuba bafihle uMnu Mbuyazi. Kugcine kufihlwe kwaMbuyazi ngeSonto esisuka kulona.
ILANGA libike kabanzi ngalolu daba ngoMsombuluko mhla ziyisihlanu kwephezulu lapho kuvele ukuthi uMaNtuli unikele enkantolo eyovimba abakwaMbuyazi ukuba bafihle uMnu Mbuyazi.
Kuthiwa uMnu Mbuyazi obesenengoduso abesehlala nayo emzini wakhe, udutshulwe wabulawa eku- seni mhla zingama-25 kuNhlaba (May) ephikelele emsebenzini kwaTransnet. Ubulawa nje ngakusasa bekulinedeleke ukuba bavukele enkantolo noMaNtuli kuyodatshulwa incwadi yomshado njengoba bese kuphothulwe konke ngesehlukaniso.
Kuthiwe uMaNtuli ufike nencwadi yenkantolo kwaMbuyazi emuva kokuba lo mndeni umchithile ekuqaleni kwesonto eyocela uxolo ngokufaka ishende emzini wendoda yakhe. Kuthiwe ufike ngoMsombuluko womhla zingama-29 kuNhlaba umndeni umatasatasa ulungiselela ukufihla uMnu Mbuyazi eqhuba inkomo nembuzi eyocela intethelelo.
Umndeni umchithile wamyalela ukuba abuye uma sekwedlule umngcwabo. Uthukuthele wagana unwabu waqonda enkantolo eyomisa ukuba kuqhubeke umngcwa- bo. ILANGA lithole ukuthi ukwenze lokhu eqhosha ngencwadi yomshado le obekulindeleke ukuba idatshulwe.
Nokho ngoLwesine olwedlule kujike izinto ngesikhathi inkantolo ivuna abazali bakaMnu Mbuyazi ukuba mabaqhubeke nokwenza amalungiselelo omngcwabo. Ngokusho komthombo oyilunga lomndeni, uMaNtuli ubengabonwa nangalukhalo ngosuku lomngcwabo.
Ngesikhathi ILANGA likhuluma naye phambilini, uvumile ukuthi ubaphazamisile abazali bendoda ukuba bayifihle. Uveze ukuthi inkantolo ivune yena ukuba afihle uMnu Mbuyazi - kepha ubesho kanjena nje, isinqumo senkantolo besingakaphumi.
Imizamo yeLANGA yokuthola uMaNtuli ngemuva kokuphuma kwesinqumo senkantolo ukuthi aziphawulele, kayiphumelelanga ucingo lwakhe beluvaliwe kwaze kwashaya isikhathi sokuloba.