UKLONYELISIWE ODELE U-R3.5 MILLION
IKLONYELISWE ngendondo yiNat Nakasa Award intatheli yelinye lamaphephandaba aseGoli eyadela isizumbulu semali engaphezu kuka-R3.5 million yokugwazelwa, yavumbulula umkhonyovu.
UMnu Sipho Masondo unikezwe le ndondo emcimbini owenziwa minyaka yonke yiSouth African National Editors Forum (SANEF) wokuklonyeliswa kwezintatheli ezenze kahle, iNat Nakasa Award Ceremony, obusehhotela eligudle ulwandle eThekwini ngoMgqibelo kusihlwa.
UMnu Joe Thloele obeyinhloko yamajaji alo mklomelo - oqanjwe ngentatheli ebambe elikhulu iqhaza kwezobuntatheli - umufi, uNat Nakasa waseThekwini owashona esekudingisweni, uncome uMnu Masondo ngokuba nesibindi sokushaya indiva imali ayeyithenjiswe ngabaphathelene nomnyango wezamanzi kuleli oholwa nguNkk Nomvula Monkonyane ukuba angalubhali udaba. UMnu Thloloe uthe:
“Le ntatheli esiyikhethile singamajaji, sivumelene ngokuthi yathola udaba lokuthi lo mnyango uhlangane nabomnyango weza- manzi eLesotho ukuba kuzodliwa izimali.
Kuthe uma kuzwakala ukuthi intatheli iyaluphenya lolu daba, yabizwa yethenjiswa ukuthi uma ingalubhali izonikwa isizu-mbulu semali esiwu-R3.5 million iphinde inikwe umsebenzi ozoyiholela imali engaba wu-R900 000 ngonyaka.
“Phezu kwakho konke lokhu, le ntatheli ulubhalile udaba.” UMnu Masondo ube esebizwa waklonyeliswa indondo yakhe eshayelwa izandla yizinkakha zezokuloba kukhona nomakade bebona bezintatheli ezifana noSolwazi Mathatha Tsedu.
Ngaphandle kwendondo, abakwaSANEF, bambhansele ngesheke lika-R20 000. UMnu Masondo uthe uyawubonga lo mklomelo, uyamkhuthaza emsebenzini wakhe.
“Ngiyayibonga le ndondo noma bengingayilindele. Mina bengibhala ngenza umsebenzi wami. Ngithi kozakwethu bayibambe iqine ngoba kulo mkhakha wethu sibuye sithwale kanzima, sisatshiswe.”
knowledge.simelane@ilanganews. co.za