SINTULA ABAXHASI ESIZOMELA I-KZN KWI-DANONE
SINTULA abaxhasi isikole esidle ubhedu kwiDanone U/12 Nations Cup okufanele simele iKwaZuluNatal emidlalweni kazwelonke eqala mhla lulunye kuNtulikazi (July) eBoksburg eGoli.
IMophela Primary School iziqwaqwade zonke izikole zaKwaZulu-Natal kweyesifundazwe ebiseSugar Ray Xulu Stadium, eCler- mont emasontweni ambalwa edlule.
Nokho lesi sikole singase singayi ukuyomela isifundazwe kule midlalo ngenxa yokuswela abaxhasi.
UBongi Msomi oyimenenja yakulesi sikole, uthi kabazi babamba bayayeka njengoba bengenabo abaxhasi ukuya kule midlalo.
Uthi badinga izimpahla zokugqoka (tracksuits) nezikhwama kwazise nejezi lesikole kalinasikhwama.
“Sicela uxhaso kosomabhizinisi ukuze kusizakale izingane. Iningi lezingane liphuma emakhaya aswele.
"Inkinga wukuthi iDanone ibahlinzeka ngokudla kwezinsuku ezimbili kuphela okwenza kube nzima kakhulu kithina kwazise sihlele ukuthi sihambe zingama-30 kuNhlangulana (June) njengoba kumele sisheshe sifike eGoli,” kusho uMsomi.
Kwabanesifiso sokufaka isandla bangafonela uS’busiso Nsele onguthishanhloko wesikole kwethi: 076 645 0939 kumbe uMsomi kwethi: 073 154 3885.