U-BENNI ULUBALUBELA UKUCIJA I-BAFANA
UBENNI McCarthy osanda kuqokwa njengomqeqeshi omusha weCape Town City ufuna ukwenza le kilabhu isitebhisi sokuqhoqhobala isigqiki esifanayo kwiBafana Bafana.
UBenni uqokwe njengomqeqeshi omusha weCity ngoLwesibili ekuseni. Usayine inkontileka yeminyaka emithathu nale kilabhu. Uthatha umsebenzi oshiywe nguEric Tinkler ojoyine iSuperSport United. Lo msebenzi ngowokuqala ngqa kuBenni njengomqeqeshi ozimele kwazise uke waba ngumsizi womqeqeshi kwiSint Truiden yaseBelgium.
Nakuba abathandi bebhola abaningi bemungabaza kodwa uthi yena ufuna ukwenza lo msebenzi isitebhisi sokuya kwiBafana.
“Ngiyazi ukuthi abantu abangithembi, vele ngisho ngisadlala impilo yami ibinjalo, bengingathenjwa kodwa ngawenza umsebenzi. Ngiyabonga ngethuba engilinikiwe kodwa ngifuna lo msebenzi ungivulele amathuba amaningi kubalwa nelokuqeqesha iBafana Bafana.
“Yilapho engibheke khona. Kuyisifiso sami ukuthi ngihole elakuleli ngelinye ilanga. Kodwa okumqoka njengamanje wukuthi ngenze kahle kwiCity, yiwona umthwalo ongimele,” kusho uBenni.