UTHONGATHI FC LUHLENGE I-KWAMASHU EZEMBENI
UJABULISE okwengane umnikazi weKwaMashu All Stars ebisigencwe yizembe kwiSouth African Football Association (Safa) KwaZulu-Natal ABC Motsepe League ibuya ehlathini emuva kokunyukela koThongathi FC kwiNational First Division (NFD). UThongathi ludle ubhedu emidlalweni yeSafa ABC Motsepe League National Play-Offs ebibanjelwe e-Eastern Cape ngeledlule.
UNkemelle Ntsoane we-All Stars, uthi weswele amazwi okubonga uThongathi ngokumutakula.
Uthi nakuba ubengalingabazi ikhono loThongathi kodwa ubenovalo.
Uthi umatasa uhlanganisa isikwati esiqinile ngoba akafuni ukuzibona esenkingeni efanayo nangesizini ezayo.
“Nginxusa wonke umuntu ofisa ukuba yingxenye yekilabhu ukuba avele ukuze kufuqwe umkhankaso wokuthuthukisa abadlali abancane,” kusho uNtsoane.
Kumakilabhu agencwe yizembe yiDundee Rangers kaSiyabonga “Nsimbi” Sangweni neGamalakhe United ebingaphansi KwamaZulu FC abashoveleke kwiSAB League.
Kuzo ezeSAB League, iqala kusasa ng0Lwesihlanu isongwe ngeSonto imidlalo yeSAB Provincial Play-Offs ezokuba ezinkundleni ezahlukene eStanger Recreation Grounds naseStanger High School ngaphansi kwesifunda Ilembe.
IJuventus izomela (uMgungundlovu), iNkobongo United (iLembe), iFerry United (uMzinyathi), iBlackpool FC (iHarry Gwala), iFC Universe (iZululand), i-Actom Homes United (uThukela), iBafana’s (uMkhanyakude), iX1 Experience FC (Ugu), iThuthuka FC (King Cetshwayo) iVlam PB FC (AmaJuba) iManzimtoti Academy noma iMageba FC (eThekwini) kwazise bekulindeleke isinqumo ngecala elithinta la makilabhu elingene izolo ebusuku.
Weswele amazwi okubonga...