IChiefs izohlukana netshe lemali
UMotaung uthembisa ukujabulisa abalandeli beziMpofana
IZOHLUKANA nesizumbulu semali iKaizer Chiefs njengoba isezinhlelweni zokwenza izinguquko ekhempini yayo. IChiefs imemezele ngoLwesibili ukuthi ichitha uSiyanda “Magazi” Xulu, uLucky Baloyi, uCamaldine Abraw noLewis Macha ezonqamula izinkontileka zabo ngokuphela kwenyanga.
U-Enocent Mkhabela uzobolekiswa isizini kwiPlatinum Stars bese kuthi uMichelle Katsvairo azanyelwe ikilabhu azobolekiswa kuyona. USiphelele “Shaka Zulu” Mthembu ophelelwa yinkontileka ngeke ivuselelwe. UPatrick Mabedi obecija iCape Town All Stars ngesizini eyedlule uqashwe njengomsizi womqeqeshi uSteve “Mphathi” Komphela.
ILANGA lithole ngemithombo yalo ukuthi iChiefs ingase ihlukane nemali engaphezulu kuka-R6,5 mi- llion ngenkontileka kaXulu, uBaloyi, u-Abraw noMacha. Laba badlali kuthiwa bebesasalelwe yizinkontileka ezingaphezulu kwesizini nale kilabhu futhi beyikha ngamafosholo imali okuzokwenza ukuthi iChiefs ihlukane nesizumbulu semali njengoba inqamula izinkontileka zabo.
Umthombo waleli phephandaba uthi akuyona le mali kuphela iChiefs ezohlukana nayo njengoba kukhona isamba esibeke eceleni efuna ukuthenga ngaso abadlali abanohlonzo.
Kuthiwa isiqedile noPhilani Zulu weMaritzburg United obephelelwa yinkontileka nale kilabhu, manje imatasa ifuna ukuthenga ngetshe lemali uJeremy Brockie ongumgadli weSuperSport United.
Kuthiwa ngeke ihlukane nemali engaphansi kuka-R5 million ngoBrockie. Kuthiwa izama nokuncenga iBidvest Wits ukuba ibadedelele uBuhle Mkhwanazi okuthiwa uyikha ngamafosholo imali kwiziTshudeni.
Sekuphele amasizini amabili le kilabhu ezinze eNaturena inganqobi neyodwa inkomishi ngaphansi kobuholi bukaKomphela othathe izintambo kuStuart Baxter kumasizini amabili edlule.
Leli phephandaba lishayela uBobby Motaung oyiMenenja-jikelele yeChiefs ngalolu daba, uthe: “Engingakuqinisekisa njengamanje wukuthi ziningi izinguquko esiphezu kwazo esizomemezela ngazo maduzane. Okwemali kangifuni ukukhuluma ngakho ngoba yinto ebucayi.
“Njengamanje sizama ukwakha kabusha ikilabhu ngoba sikholwa wukuthi sibazwise ubuhlungu abalandeli bethu. Sifuna ukuzama ngawo wonke amandla ukubathoba izinhliziyo njengoba kuzoqala isizini entsha.”