ITHEMBA NGEBUYA LE-SWALLOWS KWI-PSL

AKALIPHONSI ithawula ngemizamo yokuvusa iMoroka Swallows ibuyele kwesinye sezigaba zePremier Soccer League (PSL) uPanyaza Lesufi onguNgqongqoshe WezeMfundo waseGauteng.

ISwallows ishoveleke kwiSAB League yaseGauteng emuva kokugencwa yizembe kwiSouth African Football Association (Safa) Gauteng ABC Motsepe League ngokuphela kwesizini edlule. ULesufi utshele ILANGA izolo ukuthi makulindwe isonto elizayo kukhona izindaba ezinhle aziphathele abathandi beziNyoni. Kuvela ukuthi ufuna ukuthenga iCape Town All Stars edlala kwiNational First Division (NFD) okubikwa ukuthi isendalini. Phambilini abalandeli beziNyoni bafe izinhliziyo kubhuntsha imizamo kaLesufi nabambisene nabo yokuthenga ilungelo leFree State Stars lokudlala kwi-Absa Premiership.