Lidume lamthatha uMotsoeneng
LIQALE ngezishisayo kwezokusakaza leli sonto esiliphethayo njengoba kuxoshwe uMnu Hlaudi Motsoeneng ngokusemthethweni kwesokuba yiCOO eSouth African Broadcasting Corporation (SABC).
Lokhu kuqinisekiswe nguSihlalo weBhodi lesikhashana, uKhanyisile Kweyama. UMotsoeneng ubesematheni ehola le nhlangano yokusakaza ngezinqumo azithathile, esolwa ezikhathini eziningi ngokuba yindlovu kayiphikiswa, ezithathela nje izinqumo engabonisananga namuntu.
Phakathi kokunye kube wukuzenyusela umholo, yindaba ka-90% wodumo kanti okushayele isipikili sokugcina kube wukubiza isithangami sabezindaba lapho eshiye khona angalazi nangezinye izikhulu zeSABC.
Ubiza lesi sithangami nje, ubesamisiwe emsebenzini ngoba kusacubungulwa izinsolo abebhekene nazo. Udaba lwesivumelwano asisayine neMultiChoice kasikaze sigwinyise amathe. Kulesi sithangami ukhwele wadilika kumalunga ebhodi lesikhashana, nekomidi lasephalamende lezokuxhumana.
Unkabi ubemiswe ngonyaka odlule emuva kokuba iNkantolo eNkulu eWestern Cape ithe ukuqokwa kwakhe kwesokuba yiCOO kwakungekho emthethweni.
Izinqumo azithathile usolwa nangazo njengoba le nhlangano kuthiwa ilahlekelwa yimali, kayenzi inzuzo. Udaba luka-90% nesivumelwano sokunikezwa kwamalungelo kuMultiChoice ukusakaza izinhlelo zeSABC kuthiwa kube nomkhulu umthelela yingakho leli bhodi lithi lisemizameni yokukhansela lezi zinqumo.
Esinye isivumelwano esizonqanyulwa ngesezinhlelo zasekuseni ezenziwa yiSABC ngokubambisana nephephandaba iThe New Age masonto onke ezisakazwa kuSABC 2.
Ngubani kafushane lo Motsoeneng ozamazamise iSABC namaqembu epolitiki imbala? Uqale kwezokusakaza eyi-freelancer ngama90s nalapho ebesolwa khona ngokuba yincelebana kaKenneth Mopeli obeyiChief Minister of the South African Bantustan of Qwaqwa ngoba belingapheli isonto kungekho udaba oluhle alwenzile ngaye.
Esesebenza kwiLesedi FM eBloemfontein wakhe ubudlelwane nosopolitiki be-ANC. Nobuhlobo bakhe noMengameli Jacob Zuma yinto engafihliwe njengoba kuvela emithonjeni eminingi ukuthi baqala ukusondelana ngo-1994 kade uZuma eyokwethula inkulumo eFree State engamukelekelanga kahle.
Khumbula njalo, ubesafufusa ngaleso sikhathi uMotsoeneng, wavele walumbambatha lolo daba, kwaba wukuzwana kwabo njalo nabanye abaholi be-ANC ngoba ebethambisa imibiko yakhe kwezithinta bona.
Ube esenxusa ukuba abaphathi bamfake emahhovisi esifunda alo msakazo nakuba ebengenamatikuletsheni, nesiNgisi singavuki. Uqale esebenza ukubika izindaba ngaphambi kokuqokelwa ukuba ngu-producer kuwo lo msakazo ngo-1999. Indaba yamanga nezitifiketi kayiyintsha njengoba ike yamxoshisa naphambilini kade ebekwe amacala okucwasa, ukungathembeki, ubuphixiphixi, ukwesabisa nokungalandeli imigomo yeSABC.
Bebungafihliwe ubungani bakhe no-Ivy Matsepe-Casaburri oke waba nguSihlalo webhodi yeSABC ngaphambi kokuba ngupremier eFree State wagcina esenguNgqongqoshe wezokuXhumana ngaphansi kukahulumeni kaThabo Mbeki.
Uvumbukile futhi ngo-2011 nokuthe kusaphele izinyanga eziyi-9 waqokelwa kwesokuba yiCOO. Yiso lesi sikhathi-ke agqame ngaso lo mnumzane, waqala wavimba kwasani ebibika kabi ngoMengameli uJacob Zuma kwaze kwaba kungenelela uMvikeli woMphakathi, uThuli Madonsela.
UMadonsela ukhiphe umbiko ngo-2014 oqanjwe ngokuthi “When Governance and Ethics Fail” nobunezincomo zokuthi ibhodi leSABC lithathele lo mlisa izinyathelo ngokungathembeki, ukuqamba amanga ngesitifiketi sakhe, ukuxhaphaza amandla ngokuqasha nokwenyusa imiholo yezisebenzi ezithile.
Iqembu eliphikisayo iDemocratic Alliance linikele enkantolo lifuna amiswe kuze kuphele uphenyo nokuqulwa kwecala. Unkabi uke wazinyusela imali isuka ku-R2.8m yaya kuR3.7m nakuba ngaleso sikhathi bekubikwa ukuthi iSABC ilahlekelwe yimali elinganiselwa ku-R395m.
Kuyobonakala sekuqoqwa ngoba okubalulekile wukuthi imisakazo esiyithandayo isebenze iye phambili ngenkululeko, kungabibikho ukugxambukela nokuxova.