IMEYA IKHALA NGOMONA WABAMNYAMA
Ichitha izinsolo zenkohlakalo
IKHALE ngomona kosomabhizinisi abamnyama iMeya yaseKokstad, eningizimu yeKwaZulu-Natal, uMnu Bheki Mtolo, yathi bamonelana bodwa - bemnyama.
Ikusho lokhu esigcawini sabezindaba ngeledlule lapho ibiyocacisa ngezinhlelo zikamasipala zokuvala inkohlakalo yamathenda ezisebenzini zawo. Ikhuluma kanjena nje imeya, kunomsindo ngokuthi kunenkampani eyodwa, iMahlubi Construction, eshanela cishe wonke amathenda athinta imigwaqo kulo masipala, okwenza kube nezinsolo zokuthi imeya inobudlelwano nayo.
Nokho uMnu Mtolo uphika uma ngentaba ukuthi yena neMahlubi bancinda odengezini olulodwa. Okwenza zande izikhalo wukuthi iMahlubi ngeyaseMzimkhulu lapho kudabuka khona imeya.
Le nkampani ifaka itiyela endaweni yababadla izambane likapondo, i-Extention 7, nakweminye imigwaqo engena elokishini laseKokstad, iBhongweni.
Ingaphezulu kuka-R21 million imisebebenzi eyenziwa yile nkampani eKokstad.
Umsindo (ngeMahlubi) usuke emuva kokuba osonkontileka abasafufusa begasele kumasipala ngeledlule befuna ukuchazelwa ukuthi kungani kubonakala izinkampani zangaphandle kwaseKokstad zithola amathenda besezingasebenzisani nabo ngenhloso yokubakhulisa bengo- somabhizinisi bendawo.
Kugcine kubanesivumelwano sokuthi izinkampani ezithola ama- thenda aqala ku-R 5 million kuya phezulu, zizophoqwa ukuthenga izinto zokwakha khona endaweni futhi zinikezele ngama-30% omsebenzi ezinkampanini ezincane. Ezihlangula ngezinsolo zokudlelana neMahlubi, uMnu Mtolo uthe akazani nabaphathi bayo, akwaziyo ngayo wukuthi yenza umsebenzi oncomekayo.
“Ikuphi inkinga uma umsebenzi unikezwa inkampani yaseMzimkhulu okuwumasipala osesifundeni esisodwa neKokstad (eHarry Gwala)?
"Leyo nkampani inikezwe umsebenzi ngoba ikulungele ukuwenza, hhayi ukuthi kube nokwenzelela futhi nomlando wayo uyazikhulumela ukuthi selokhu yawuqala umsebenzi wamathenda yenza kahle,” kusho uMnu Mtolo.
Unxuse osomabhizinisi baseKokstad ukuba bangasetshenziswa ngosopolitiki ngenxa yengqungquthela ye-African National Congress (ANC) kuleya ndawo, ezokuba ngenyanga ezayo.
Uthe wazi kahle ukuthi abanye abangabaphathi balezi nkampani ezikhonondayo badlala ipolitiki khona ngaphakathi kwi-ANC. “Izinkampani zangaphandle eziqhamuka ngisho koGoli nakwezinye izindawo, kade zenza imisebenzi eKokstad kodwa kakuzange kubekhona umsindo.
"Kumanje kunesikole esakhiwa wumnyango sika-R 46 million elokishini, kakukho neyodwa inkampani yaseKokstad ehlomulile kulowo msebenzi.
"Kunomsebenzi kaSanral ongaphezulu kuka-R 200 million, kakukho noyedwa umuntu waseKokstad ohlomulayo kuyaxaka ukuthi kungani kubhekwa le (iMahlubi). kusho uMnu Mtolo.
Uthe yena nenkohlalo yizinto ezimbili ezingahlangani. “Ngaphambi kokuba ngibe yimeya, bengingusomabhizinisi futhi ngingakutshela ngingananazi ukuthi eminye imisebanzi bengiyinqaba ngoba bengibona ukuthi izolandelwa yinkohlakalo,” kusho yena.
Umphathi weMahlubi, uMnu Siviwe Mahlubi, uthe uyaweseka kakhulu umbono wokusebenzisana nosomabhizinisi bendawo kangangoba emhlanganweni ababebizwe kuwona wumasipala, nguyena kuphela oveze izinhlelo zabo zokukhulisa osomabhizinisi abancane.
Ugxeke amahemuhemu okuthi uthola amathenda ngoba esondelene nemeya wathi: “Wumsebenzi wami ozikhulumelayo ezindaweni zonke engisebenze kuzona.
"Indaba yepolitiki nosopolitiki kangingene kuyona, ngayigcina ngisesesikoleni.”