Usatshiswe ngokucetshwa kuZuma
Wathi makube njalo
KUVELA ukuthi yisibindi sikaNgqongqoshe wezamaBhizinisi kaHulumeni esiholele ekwesuleni kukaDkt Baldwin “Ben” Ngubane ekubeni ngusihlalo webhodi yakwa-Eskom - okwenzeke ngoMsombuluko odlule.
Iphephandaba lesiNgisi eliphuma ngeSonto, iCity Press, liveza ukuthi isizathu sokwesula esikhundleni isigubhukane kukaDkt Ngubane wukuthi uNgqongqoshe Lynne Brown ubeshaya phansi ngonyawo ukuba kubambe uMnu Zethembe Khoza esikhundleni sokuba yisikhulu esiphezulu kule nkampani esiphenduke undabizekwayo ngezinkinga.
Lesi sikhundla besivuleke emuva kokuxoshwa kukaMnu Brian Molefe obesephenduke iyoyo yezikhundla, eshona le nale, njengoba eke waba yilunga lephala- mende izinyanga ezimbalwa emuva kokuba izwe litshelwe ukuthi wesulile kwa-Eskom.
Kubuye kwathiwa akasulanga ubehlabe ikhefu elingakhokheli, gwiqiqi, kwathiwa uthathe umhlalaphansi oyiklume. Ubuyele kwaEskom, kwatinyelwa uNkk Brown ngalokho - ube esekhonjwa indlela.
Kuvela ukuthi uDkt Ngubane ubefuna uMnu Khoza kwesokubamba esesikhulu esiphezulu kodwa uNkk Brown washaya phansi ngonyawo. Kuthiwa uDkt Ngubane wesabise uNkk Brown ngokumceba kuMengameli Jacob Zuma uma eqhubeka nokuqinisa ikhanda, engalamukeli igama likaMnu Khoza.
Imithombo emibili ezazi kahle ezomhlangano obungoMsombuluko odlule phakathi kukaNkk Brown noDkt Ngubane, ithi:
“Wesabise ngokuthi uzokwesula uma ungqongqoshe engaqoki umuntu obefunwa nguyena, ungqongqoshe uvele wamtshela ukuthi kulungile makesule. Wesabise ngokuthi uzomceba kumengameli, ungqongqoshe wathi nalapho futhi ungakwenza lokho ukhu- luleke.”
Esikhundleni sokuba uMnu Khoza aqokelwe kwesesikhulu esiphezulu, ugcine esebamba esikasihlalo - sona lesi esishiywe nguDkt Ngubane. Kubikwa ukuthi omunye umuntu obefunwa nguDkt Ngubane nguNkk Ayanda Noah oyiGroup Executive for Distribution kwaEskom.
UNkk Noah kuthiwa ubeyingxenye yabebesha amashushu ukuba kukhokhiswe omasipala abadla ngandoda - abakweleta i-Eskom izindodla zemali. Umthombo uthi emuva kwalo mhlangano obuvutha bhe, uDkt Ngubane ubuyele ehhovisini likaNkk Brown ngezithuba zehora le-15h00 esehamba nabameli bakhe, wesula.
UNkk Brown umemezele ukwesula kukaDkt Ngubane emuva kwehora lama-23h00 - ngawo uMsombuluko odlule - ngesitatimende esikhishwe egameni lomkhulumeli wakhe, uMnu Colin Cruywagen. ICity Press ithi uDkt Ngubane wale waphetha ukukhuluma nayo ngesikhathi ethintwa ngoLwesihlanu.
“Hhayi, kangikhulumi nabezindaba,” washo wavala ucingo lwakhe. I-Eskom ibe sematheni ngesikhathi uMnu Molefe ebuyela kuyona mhla zili-15 kuNhlaba (May) emuva kokuba kade ethole “amadlelo aluhlaza” okuba yilunga lephalamende elimele i-African National Congress (ANC) kanti uzokhonjwa indlela zingama-31 kuyena uNhlaba.
I-Eskom ihlale izinsuku ezili-18 ingenaso isikhulu esiphezulu - okuyikhona okuthiwa kwenze uDkt Ngubane wagqugquzela ukuba uMnu Khoza abambe lesi sikhundla. Emuva kwezinsuku ezimbili uMnu Khoza ebambe njengosihlalo we-Eskom, ufake amaphepha afungelwe eNkantolo yezeziSebenzi ethi le nkampani ngeke iphikisane nesinqumo sikaMnu Molefe sokulwela ukuba uxoshwe kungafanele, uNkk Brown uzozimela yedwa enkantolo.
Emaphepheni afakwe enkantolo ngoLwesine, kuvela ukuthi i-Eskom iyahambisana nokuba uMnu Molefe unikwe umhlalaphansi oyiklume ngephutha. UNkk Brown uzwakala esehuba enye ingoma emaphepheni asenkantolo mayelana nokuthi uMnu Molefe wesulile phambilini kwa-Eskom, wukuthi ubehlabe ikhefu elingakhokheli nokubuyiselwa kwakhe ngokungemthetho kule nkampani.
Uthi ukubuyiselwa kwakhe kwesokuba yisikhulu esiphezulu kwaEskom bekungekho emthethweni.
“Ngakho-ke uMnu Molefe akaxoshwanga njengoba esho, empeleni ukubuyiselwa kwakhe njengesikhulu esiphezulu kwenziwe phezu kwesivumelwano esingekho emthethweni.
“Ngibe sengiyalela ibhodi ukuba lisicishe isivumelwano sokumbuyisela ngoba besingekho emthethweni. Akaxoshwanga kwazise ubengabuyiselwanga ngokusemthethweni emuva kokuba esulile mhla zili-11 kulwezi (November) wezi-2016.”
Wesabise ngokuthi uzokwesula uma ungqongqoshe engaqoki umuntu o...