IMEYA ITHEMBISA UKUHAMBA KWEZIKASHENGE
ITHEMBISE ukuhamba ezinyathelweni zomholi wayo imeya entsha yaKwaNongoma, enyakatho yeKwaZulu-Natal, uMnu Albert Mangaqa Mncwango ( osesithombeni) egcotshwe ngoLwesine.
UMnu Mncwango uthi uzimisele ngokuhamba ezinyathelweni zeNkosi Mangosuthu Buthelezi engumengameli weNkatha Freedom Party (IFP) eyinkukhu nempaka nenkohlakalo.
Ufungiswa kulesi sikhundla nje, kwesule isigubhukane kusona uMnu Sthembiso Mathaba obengakaqedi ngisho unyaka esiqhoqhobele. Ubegcotshwe mhla zili-18 kuNcwaba (August) nyakenye engene njengekhansela elimele i-IFP. INkatha iqophe umlando kulo masipala ngokuqoqa wonke amawadi angama-21.
Ithole isihlalo esisodwa sekhansela elimele iqembu. UMnu Mncwango ugcotshwe kunovalo lokuthi ingxenye yamakhansela e-IFP ngeke ameseke ngoba ethi kuphoqwe uMnu Mathaba ukuba ashenxe esikhundleni. I-Economic Freedom Fighters (EFF) ne-Democratic Alliance (DA) baludubile ukhetho ngoba bethi badinwa wukuthi kunamakhansela ahlalwe ngobhongwane ukuba avotele uMnu Mncwango ngenkani.
Nokho amakhansela eNkatha akhombise ukwethembeka eqenjini lawo. “Thina siyawazi umthetho, besingeke nje nangebhadi sivotele umuntu ongelona iqembu lethu ngoba siyazi ukuthi singaphelelwa wukwethembeka kubantu nase- malungeni enhlangano.
"Ubaba uMncwango siyamemukela futhi sizosebenza naye ngokukhulu ukubambisana ukuze kuzoba lula ukuhambisa izidingo emiphakathini. Besingeke sivote nelinye iqembu,” kusho elinye lamakhansela eNkatha. UMnu Mncwango kulindeleke ukuba abe nomhlangano wakhe wokuqala namakhansela kuleli sonto. Ubonge iqembu lakhe ngokumnikeza ithuba lokuhola lo masipala. “Ngibonga iqembu ngokungiphakamisa ukuba ngizoba yingxenye yobuholi balo masipala ukuze kuzohanjiswa ngokunamandla izidingo zabantu.
"Ngicela kuzona zonke izinhlaka zalo masipala ukuba sibambisane ukuze sikwazi ukufeza izinhloso zabavoti baKwaNongoma. Ngiyethembisa ukuthi ngizosebenza ngokuzikhandla ukulwa nenkohlakalo njengoba ngiyisitha sayo. Ngizimisele ngokuhamba ezinyathelweni zikamengameli weqembu lami, iNkosi Mangosuthu Buthelezi eyisitha senkohlakalo,” kusho uMnu Mncwango.
Ubefike namalunga omndeni wakhe abezomeseka amhalalisele ngokuthatha kwakhe lesi sikhundla.