BELICOKEME IZINGA KWABE-JAZZ
IBABAZE ubuhle bezimbali zaseNingizimu Africa inkakha yomculo we-jazz ehlonishwa umhlaba wonke ngesikhathi inandisa emcimbini obuseNkosi Albert International Convention Centre obizwa nge-International Jazz Extravaganza ngoMgqibelo.
UKurt Elling uthe kusuka ehla esikhumulweni sezindiza ubelokhu ekhangwe wubuhle babesifazane bakuleli.
“Angikaze ngibubone ubuhle obunje! Abesilisa bakuleli kumele engabe bahlezi bephethe imiqhele ezikhwameni abazoyichoma kulowo nalowo wesifazane abahlangana naye,” kusho yena.
Le nkakha yaphesheya kwezilwandle ibishaya umculo ohamba negazi idlalise iphimbo kuchwaze izihlwele, zilokhu zilishaye njalo ihlombe. Ubugcina usunokudideka ukuthi kungabe ukwikhonsathi ka-Al Jarreau noma kaMichael Buble ngenxa yokufana kwamaphimbo amtoti.
Ingoma ethi Golden Lady ingenye yezingoma ethandwe kakhulu kwaziculile nokuthe uma esephuma esiteji kwahlala obala ukuthi abalandeli bebesafuna impinda.
UThandi Ntuli ungene kuqala esiteji encinza upiyano aphinde ashaye ngephimbo lakhe elimtoti nebhendi yakhe. Uqhulule izingoma ezintsha njengoba wayethembisile waphinde wadonsa umucu othandwa kakhulu obizwa ‘Umthandazo’ okwicwecwe lakhe lango2014.
UMonty Alexander waphesheya kwezilwandle ushaye into ecoke- me nebhendi yakhe, umculo wakhe ubuzwakala ukuthi unesigqi saseJamaica.
Kuvele kwahlala obala ngesikhathi edlala i- piano ukuthi kungani ebalwa kuma- pianist ahamba phambili emhlabeni jikelele. UNduduzo Makhathini uvale inkundla eshaya umculo onesigqi saseAfrica nabantu bakhombise ukumthakasela ngesikhathi enhlanhlaza u- piano obekubonakala ukuthi ngathi usesemhlabeni wakhe yedwa. Lo mcimbi ubuphethwe ngobunono nguNothemba Madumo noBrenda Sisane.