Lihlehlile elokugwetshwa kombhishobhi kugula umshushisi
Ulahlwe ngamacala angama-745 okukhwabanisa
SEKUDIDEKE ngisho osiyazi ngokuhlehliswa kwezinsuku zokugwetshwa kukaMbhishobhi Jabulani Mvubu osekwenzeke izikhawu ezintathu ngenxa yokugula okuqhamuka esikhaleni, okuphazamisa leli cala eliqhubeka eNkantolo yamaCala obuGebengu obuHleliwe eThekwini.
Bekumele agwetshwe ngoLwesine uMbhishobhi Mvubu kepha kwaphinde kwahlehliswa ukukhishwa kwesigwebo ngenxa yokugula komshushisi nosonhlalakahle. Bekungekhona okokuqala kuhlehliswa njengoba ngokudlule mhla zili-13 kwephezulu, kugule ummeli wakhe umbhishobhi, u-Adv Thembinkosi Nene, ofike enkantolo efake isifonyo entanyeni emuva kokubandakanyeka engozini yemoto.
Selokhu liqalile ukuqulwa leli cala, yimantshi uNkz Christo Mazibuko kuphela esenenhlanhla yokungaphuthi kulona. NgoLwesine uNkz Mazibuko ulihlehlisele umhla zingama-29 kwephezulu ukuba nakanjani umbhishobhi anikwe isigwebo sakhe.
Inele yalihlehlisa icala imantshi, kwezwakala othile ohlangothini lwezisulu ethi: “Ha, kusetshenzwa imali lapha.”
Ebuzwa yintatheli ukuthi uthini ngalaba abathi sekusebenza umuthi kuleli cala, umbhishobhi uvele wahleka kancane wathi: “Akukho muthi yidolo nje kuphela, ngiyathandaza.”
ILANGA lifike ngezithuba zokugamanxa kwehora lesi-7 ekuseni ngenxa yokuthi inkantolo incane, izisulu nabalandeli bakaMbhishobhi Mvubu baningi. Umbhishobhi ungene enkantolo esebekelwe indawo ngabalandeli bakhe, engazi nanyaka, echofoza umakhalekhukhwini wakhe.
Bekumele icala lingene ngehora lesi-9 kepha kwangena isisebenzi senkantolo sizosho ukuthi selizoqala ngehora le-11, kusalindwe ummeli.
Ngaphandle kwenkantolo sekuphunywa, u-Adv Nene uzwakale ekhuluma nozakwabo esholo phezulu ethi:
“Abantu bathi bangabazalwane kepha kabakwazi ukuthethelela uMvubu esexolisile. Bathi makaboshwe kepha bayayifuna imali, kumele basho okukodwa.”
Ubesho kanje engaboni ukuthi leli phephandaba liyamlandela.
UMbhishobhi Mvubu ulahlwe ngamacala angama-745 okukhwabanisa imali emuva kokuba eyiqoqe kubantu ngenhloso yokuba basungule amabhizinisi athi bona. Umuntu emunye ubekhokhiswa u-R2 500, babe yiqoqo labayisihlanu. Bebethenjiswe ukuthi uma imali yoxhaso evela phesheya ifika, bazozuza u-R15 million iqoqo ngalinye.
Ubehweba ngegama elithi “Zuza 4Life‚Äù, igama lebandla lakhe yiGrace Ministries. Nanxa kuzwaka- la ukuthi izisulu zithi makaye ezikhindini uMbhishobhi Mvubu, kodwa zithi zinethemba lokuthi umbuso uzovuna isicelo sazo zibuyiselwe imali yazo aphinde ajeziswe.
knowledge.simelane2ilanganews. co.za