Iqhinga elisha lokuvikela ingculaza
SELIDUME ledlula ngengqungquthela yamazwe ngamazwe eqondene nobhubhane lwengculaza nesandulela sayo ebingedlule eNkosi Albert Luthuli International Convention Centre - obekuyesi-8 yenzelwa eNingizimu Afrika.
Isikhulumi esimqoka ngosuku lokugcina lwale ngqungquthela, bekuyiSekela-mengameli laseNingizimu Afrika, uMnu Cyril Ramaphosa.
Kule ngqungquthela ziba ningi kakhulu izihloko ezidingidwayo futhi lokhu kwenzeka ngesikhathi esisodwa emagunjini amaningi angaphakathi kule ndawo.
Esinye isihloko esithintiwe kule ngqungquthela, ngesimayelana nokufezeka kwephupho okungase kwenzeke lapho imiphumela yocwaningo lwakamuva inika ithemba ngekhambi elisha elingase linciphise ingozi yokutheleleka kwabesifazane ngesandulelangculaza.
Kulolu cwaningo olubizwa ngeThe Ring Study nolunye olubambisene nalo - lona olwaziwa ngeASPIRE olwenziwe yiMicrobicide Trials Network - kuvele ukuthi i- dapivirine vaginal microbicide ring ingaba nosizo oluphephile ekunciphiseni ukutheleleka ngesandulela-ngculaza uma isetshenziswa njalo.
Uphenyo ngaleli khambi lusingethwe yi-International Partnership for Microbicides (IPM) kanti leli khambi liwubuchwepheshe bokuqala obulungiselwe abesifazane ukuba bazisize ekunciphiseni ingozi yokutheleleka ngesandulela-ngculaza.
Okushayelwa ihlombe ngaleli qhinga wukuthi linikeza abesifazane amandla aphelele okulawula lesi simo kwazise lubuye lungabi- khona ubambiswano nezithandwa zabo maqondana nokusetshenziswa kwejazi lomkhwenyana. IYINI LE DAPIVIRINE RING? Iyikhambi elisetshenziswa zonke izinyanga lokuvimbela ukutheleleka ngesandulelangculaza, elakhiwa yinhlangano engenzi nzuzo, i-IPM.
Isebenza ngokuba owesifazane agqoke “iring” ededela kancane kancane umshanguzo owaziwayo we-ARV, okuthatha inyanga.
KUNGANI IFANISWA NEPHUPHO?
Njengoba isesesigabeni sokuhlolwa, ngesikhathi sokuyihlola le ndlela, kuzobhekwa ukuthi labo abazinikele ukuba uhlelo luzwe ngabo amanzi ngobhoko, bayilandela ngokwethembeka imiyalo yokuyisebenzisa ukuze ekugcineni iphasiswe ukuba isebenze emphakathini. Okwamanje izinkomba zithi labo abenze njengoba kushiwo, ingozi yokutheleleka inciphile ngesilinganiso esingama-56%. Uma ufisa ukuthola kabanzi ngalokhu unikela kwisizabulwembu (website) esithi: www. IPMglobal.org noma ubheke itwitter yabo : @IPMicrobicides