LAFA IZWE LIFELA EZANDLENI ZETHU
MHLELI: UNkulunkulu wasidalela ukuba siphile sonke emhlabeni wakhe futhi wayenenhloso enhle ngawo wonke umuntu amdalile.
Njengoba sibamnyama, wayengeke asinike ibala elimnyama angasiniki indlela yokuhambisa ngendlela yalelo bala. Ukufa komuntu kuyinto engekho ezweni. Ngiyezwa nje manje kukhalwa kakhulu ngokudlula kwabesifazane ngokudlwengulwa babulawe eGoli nokufa kwezingane okwedlula emakhulwini ayisihlanu ngosuku.
Zibulawa ngendlela ehlukene, zicwiywa izitho zangasese, zijikijelwe le kodoti noma zijikijelwe emifuleni noma ezikhotheni.
Okuxakayo wukuthi imisakazo emikhulu kayikhulumi kakhulu ngezingane ezizalwa ngonina bazijikijele kodoti noma ezikhotheni nasezindlini zangasese noma bazilaxaze ezibhedlela.
USathane uyajabula futhi uyadansa ezweni, lisezandleni zakhe ngqo izwe elibizwa ngeNingizimu Afrika. Ngifisa sengathi osomabhizinisi abanezimali eziningi bangaxhasa lezi ziteshi zemisakazo ezihamba ngegiya likaNkulunkulu ukuba zikhiphele abantu yonke into eyenzeka ezweni.
Kulezi ziteshi ezinkulu abantu kabatshelwa okunye ngoba zicheme nezinhlangano zezepolitiki, zikhipha izinto zibuye zicabangele amaqembu azo ukuthi uma sezizikhipha masinyane lezi nalezi zilandelana, zibulala iqembu lazo.
Ingani basezikhundleni eziphakeme, bahola izimali ezinkulu, bahamba ngezimoto ezinkulu, bahlala emizini emihle emikhulu bamnyama bakhohliwe ngengunaphakade yabo.
Nabo-ke abaphansi laphaya, ukubulalana kwabo kusihlekisa ngamanye amazwe kodwa-ke ngoba kwenziwa ngabamnyama, kakubukwa nhlobo futhi kakucatshangwa ukuthi makulungiswe ngokushesha.
We muntu waseNingizimu Afrika, uke ubone ungena ehhovisi uyocela usizo uhlangane nabantu nezikhalo zabo eziningi kepha ucabanga ukuthi bayaye baluthole ngendlela eyiyona?
Ngapha izizwe zisonge izandla ziyabuka zithi: “Bathi bakhululekile, abakhululeke phela.”
Kayikho yini indlela yokushintsha uhlobo lwegiya esihamba ngalo ngokusiza amaphoyisa nokubabona kahle abenzi bezinto, sibabambe thina sibayise emaphoyiseni?
Singaba futhi namakomiti aqondene ngqo nobugebengu ezindaweni esikuzona aphinde ahlangane namaphoyisa? “Wena othanda uJehova zonda okubi” Amahubo 97: 10. Nkosinathi Richard Ziqubu, KWADUKUZA