Luseyindida olwezigidi zaseLibya
Elakuleli liyishaya indiva i-United Nations ngodaba lwaseLibya
ININGIZIMU Afrika, yi-African National Congress (ANC) nenkampani ekhiqiza izikhali, iDenel, bashaye indiva ithimba le-United Nations (UN) mayelana neLibya ngesikhathi bebuzwa ngamahlebezi ezigidi zamarandi zikaMuammar Gaddafi - obengumengameli waseLibya, washona ngowezi-2011 - nendlela enyusa izinhloze obekuthengwa ngayo izikhali.
Lokhu kusembikweni ohlanganiswe yithimba le-UN okwiUN Security Council, mayelana nezikhali nemali okushintshane izandla phakathi kweNingizimu Afrika neLibya ebikhungethwe yizinkinga.
Ngokwaleli thimba le-UN, izithunywa zaseLibya ezizichaze njengeLibyan Air Force ne-Air Territory Defence Forces, zi-ode inqwaba yezikhali kwaDenel kubalwa izindiza ezinophephela emhlane ezingama-84 ezaziwa ngeleRooivalk, ezinye ezibizwa ngama-Atlas Oryx ezingama-40, yimicibisholo ekhafula umlilo engama-500 neziqhumane eziyizinkulungwane ngezinkulungwane.
“Isibalo nezinhlobo zezikhali ebezifunwa yiLibya, sikhomba ukuthi yiningi imali ebikhona futhi nezingxoxo bese zikuvuthondaba. Abantu ababili abebeyingxenye yezingxoxo baphonswe imibuzo ngokwehlukana.
"Bobabili bakuqinisekisile ukuthi lezi zikhali zizothengwa wumbuso kaGaddafi ngomcebo wakhe othukuswe eNingizimu Afrika,” ngokusho kwamaphepha akwi-UN.
Ngokwalo mbiko, uNgqongqoshe wezokuVikela, uNkk Nosiviwe Mapisa-Nqakula, uzesekile izingxoxo zeDenel encwadini ekhuluma ngomhlangano obuseGoli mhla ziyisihlanu kuNdasa (March) wezi-2013. Lokhu kwenzeke yize iLibya ibinswinyiwe ukuba ithengiselwe izikhali.
Leli thimba lisophe nokuqinisekisa amadokodo amayelana nemali ewu-R10.2 billion esuswe egatsheni lakwaStandard Bank eNingizimu Afrika, yafakwa kwiakhawunti yakwaStabic eKenya. “Leli thimba lithole amadokodo akhombisa ukuthi kunesigaxa semali esikhishwe kwenye i-akhawunti safakwa kwenye - egameni leLibya Africa Investment Portfolio [LAIP] - esigabeni sesibili sonyaka wezi-2011.
"Le mali ikhokhwe nguBashir Saleh al-Shrkawi (obechazwa njengosomabhange kaGaddafi) eyisusa kwaStandard Bank. Abaphathi beLAIP batshele ithimba le-UN ukuthi kabazi ukuthi le mali ibi- yaphi kodwa kuvela ukuthi kunemali ethile yaseLibya efihliwe kodwa ekwazi ukutholwa ngamalunga ombuso kaGaddafi aseNingizimu Afrika,” ngokusho kombiko wethimba le-UN.
Ngokwalo mbiko, u-Al-Shrkawi uvumile ukuthi uke wasebenzisana neLAIP ngowezi-2009 kodwa wathi akaze azihlanganise nezimali zayo kusukela ngowezi-2011. UMnyango wezoBudlelwano namaZwe angaPhandle nokuXhumana, wuMnyango wezokuVikela neNational Conventional Arms Control Committee kabayiphendulanga imibuzo yeRapport, okuyiphephandaba elingudadewabo weCity Press.
Leli phephandaba lithi lize layogaya neStandard Bank ingakaphenduli mayelana nezimali ebeziphuma kwenye i-akhawunti ziyiswa kqwenye. News24