SISASHUBILE ISIMO ESYRIA
UMBUTHO wezempi waseRussia ukhiphe isitatimende ngoMgqibelo uthi uthele othulini okhomanda ababili be-Islamic State of Iraq and Syria (Isis), u-Abu Omar alBeljiki no-Abu Yasmin al-Masri ngesikhathi udedela iziqhumane ngasedolobheni iDeir ez-Zor elisempumalanga yeSyria kule nyanga.
Isitatimende somnyango wezokuvikela eRussia siphuma nje, leli lizwe lisanda kuthi kungenzeka ukuba libulale umholi we-Isis, u-Abu Bakr al-Baghdadi ngesikhathi lidedela iziqhumane ngenyanga edlule.
Uhulumeni wase-United States of America (USA) nawo ongazibekile phansi eSyria, uthi ngeke wakwamukela ukuthi ishoba selilele amazolo kuBaghdadi kanti nezikhulu zakwamanye amazwe ase-Europe nezase-Iraq zishaya amakhala kwazise kakuqali ukuvela kwezindaba zokuthi lo mholi wendele koyisemkhulu - kodwa wabuye wabonakala esadla anhlamvana.
IRussia ithi ibulale izihonga zeIsis ezili-180 kubalwa u-Al-beljiki no-Al-Masri esikhoweni saleli qembu lezihonga zamaSulumane eDeir ez-Zor mhla ziyisi-6 namhla ziyisi-8 kuNhlangulana (June). UHisham al-Hashimi ongusomaqhinga waseBaghdad, e-Iraq - osecebise ohulumeni abaningi eMiddle East mayelana ne-Isis - uthe unongabazane ngokushiwo yiRussia.
Uthe u-Abu Yassin al-Masri ngumuntu oyedwa no-Abu al-Haj al-Masri, okuthe ngoLwesihlanu iRussia yaveza ukuthi imbulele ngaseRaqqa ngoNhlaba (May). Uthi akakholwa ukuthi u-Al-Beijiki ubeseSyria ngesikhathi iRussia ihlasela.
“IRussia izama ukuzakhela igama nje mayelana nokulwa neDaesh (okuyisiteketiso se-Isis) kwazise yi-USA esabulale okhomanda abesatshwayo baleli qembu lezihonga, okubalwa kubona u-Abu Omar al-Shishani, u-Abu Muslim al-Turkmani, u-Abu Mohammed al-Adnani no-Abu Ali al-Anbari,” kusho yena.
Uma okushiwo yiRussia kungamanga, isithunzi sayo sizolimala kakhulu. Kubukeka sekuseduze ukuba izihonga ze-Isis zigobe uphondo emadolobheni angomakhelwane, iMosul ese-Iraq neRaqqa eseSyria - emuva kokubusa izigidi zabantu bakhona cishe iminyaka emithathu.
Inhlanganisela yamasosha eholwa yi-USA, ilekelela i-Iraq eMosul kanti eRaqqa ilekelela iSyrian Democratic Forces (SDF) ehlanganiswe “ngamasosha” amaArab nawamaKurd. Njengoba i-Isis isihlehla nyova ezindaweni eziningi eSyria, isibambelele ngezidindi esifundazweni esisempumalanga eDeir ez-Zor lapho iRussia ilekelela khona amasosha ahambisana noMengameli Bashar al-Assad. Umthombo ngabe: Independent.co.uk