UHEHA IZINDIMBANE OWOKUQWALA IZINTABA
USUHEHA izindimbane zabantu umdlalo wokuqwala izintaba ngezimoto ezingama4x4 nangezithuthuthu oba minyaka yonke eNgodini, eShowe.
Owanonyaka uqale ngoLwesihlanu wasongwa izolo ngeSonto. Lo mdlalo ubizwa ngeNgodini Games, kanti usuqala ukungena nakwabaMnyama njengoba uthandwa kakhulu ngabamhlophe.
UThokozani Mabaso ohlela le midlalo uthi ufuna ukuwubona ubalwa nemidlalo yalolu hlobo ehamba phambili eNingizimu Afrika.
Kule midlalo bekukhona abantu abaphuma eWestern Cape, eFree State, eGauteng, eLimpopo nakwezinye izifundazwe. NgoLwesihlanu lweholide lweNtsha kuqalwe ngemidlalo yesintu (umagalopha, u-3tin, ushumpu ukubala nje embalwa). NgoMgqibelo bekunomdlalo wezimoto nowezithuthuthu ezinamasondo amane. Lezi zimoto beziqwala izintaba zibuye zincintisane ngesivinini.
Abantu abebehambele lo mdlalo bebeceliwe ukuba baphathe noma yini abangasayisebenzisi ukuze kunikelwe ngayo emphakathini kwazise le ndawo ingenye yezihaqwe ububha eNingizimu Afrika.
UMabaso ekhuluma naleli phephandaba uthe: “Lo mdlalo uqale nyakenye lapho bewuhanjelwe ngabantu abangaphezulu kwezi-2500.
“Ngibonga kakhulu inkosi yendawo engiphe le ndawo esiyisebenzisayo ukuhlela lo mdlalo. Ngosuku lwemidlalo kuqashwa abantu abangaphezulu kwama-200 bakule ndawo. Okungithokozisa kakhulu ukuthi abebala elimhlophe bawukhonze kakhulu lo mdlalo kwazise bayazifela ngempilo yasehlathini. Bafika lapha bewumndeni bezokhempa khona lapha ehlathini baze bahambe uma sekuphele imidlalo. Isikhathi esiningi ngihlale ngihleli nabo lapha ehlathini bezoziqeqesha. Lo mdlalo ngeke udlalelwe eduze nemizi yabantu kwazise uyingozi. Ngenxa yobungozi bawo ngiyakuqinisekisa ukuthi abezempilo bahlale bekhona. Abenze kahle kunemiklomelo abahlomula ngayo ephuma emnyangweni wezemidlalo waseMhlathuze. Ngosuku lokugcina siyaye sihambele umphakathi,” kusho uMabaso.