Kudungeke imidlalo yeSAB League ngenxa yecala
KUDUNGEKE imidlalo yokukhipha umakhonya waKwaZuluNatal kwiSAB League ngenxa yecala elifakwe yiMageba Warriors yaseThekwini.
Le midlalo iqale ngoLwesihlanu kanti bekuhlelwe ukuthi isongwe izolo ngeSonto KwaDukuza ngaphansi kweSouth African Football Association (Safa) Ilembe Region. IMageba imangalele iManzimtoti Academy nayo yaseThekwini ngokudlalisa abadlali abangabhalisiwe. Lolu daba beluhlalelwe phakathi nesonto kwanqoba iManzimtoti. IMageba ilujikijele kumahluleli ozimele. Ulihlalele ngoMgqibelo ebusuku kumincelwe ukuthi isinqumo asikhiphe izolo ekuseni bese kuqhubeka imidlalo. Nokhoke kakwaze kwenzeka lokhu okuphoqe ukuthi imidlalo ihlehliswe. Le midlalo ngeyokuhlungela ukungena kwiSafa KwaZulu-Natal ABC Motsepe League.
UKwenzakwakhe Ngwenya wekomidi lemiqhudelwano kwiSafa esifundazweni ubetshele ILANGA ukuthi imidlalo izoqhubeka nakuba bekusalindwe isinqumo sikamahluleli. Uthe iWarriors isebenzise ilungelo layo elikumthethosisekelo weSafa ukuyisa lolu daba kumahluleli. Uthi iManzimtoti ibikhona kule midlalo kwazise beyivunywe yisinqumo secala phakathi nesonto. Le kilabhu ibihleli ehhotela ebelibhukhwe yiSafa.
Omunye wabalandeli obekhona kule midlalo ushayele leli phephandaba edinwe eveva ngesenzo sezikhulu zeSafa sokumisa le midlalo ngenxa yokuthi imiphumela yecala igcine ingaphumanga.
IJuventus yaseMgungundlovu kuqinisekiswe ukuthi isinyukele kwiKZN ABC Motsepe League ngenxa yokuthi ibingadidiyelwe eqoqweni elilodwa nekilabhu yaseThekwini. Ikilabhu yaseThekwini, okungaba yiMageba noma yiManzimtoti izodlala neFerry United yaseMzinyathi ne-X1 Experience yasoGwini.
I-Experience iguqise iFerry United ngo-4-1 izolo.