EZINOJU NGEMIDLALO KASANGWENI
ISITHAKWE ngemidlalo yokuqwala izintaba iSiyabonga Sangweni Tournament and Youth Celebration ezoqala mhla ziyisi-7 isongwe ziyisi-9 kuNtulikazi (July) eDondotha Sports Ground kwesaKwaMthethwa, eMpangeni.
Lapha kuzokuba nomjaho wezithuthuthu nowamabhayisekile okuyinto ezokube iqala ukwenzeka selokhu kusungulwe le midlalo ngonyaka wezi-2013.
Lo mqhudelwano uzophinde usetshenziselwe ukulwa nokubulawa kwabantu bebala elimhlophe okuwumkhuba okuthiwa udla lubi eMfolozi. Lokhu kuzokwenganyelwa wuMasipala waseMfolozi neHhovisi likaNdunankulu waKwaZulu-Natal.
Kuzophinde kuqwashiswe umphakathi ngokuhlaselwa kwabesifazane nezingane okuwumkhuba osuphenduke imfashini eNingizimu Afrika.
Kulo mqhudelwano kusuke kudlalwa imidlalo eyahlukene kubalwa unobhutshuzwayo, isibhakela sama-amesha, i- netball neyesintu. USmanga Mgenge oyiMeya yaseMfolozi uthi bakujabulele kakhulu ukungena kwehhovisi likaNdunankulu kulo mqhudelwano ukuzoqwashisa umphakathi. Uthi nakulo nyaka lo mqhudelwano uzokube uphelezelwa yidili lo mculo okuzonandisa kulona abaculi abehlukene. Ukugcizelele ukuthi ngeke babizwe abaculi bakamasikandi abaklwebhanayo ukugwema izi- xakaxaka. UMgenge uthi ngonyaka ozayo kungenzeka lo mqhudelwano uthakwe ngomdlalo wokupiniswa kwezimoto njengoba ujwayele ukuheha abantu abaningi.
Le midlalo bekumele ibe ngempelasonto ezayo kodwa yahle- hliswa ngenxa yeNedbank Cup nezivivinyo zikamatikuletsheni. Lo mqhudelwano kuhlonishwa ngawo uSiyabonga “Nsimbi” Sangweni odume kwiLamontville Golden Arrows, kwi-Orlando Pirates nakwiBafana Bafana.