ILIBANGISA E-BERLIN INGQWELE YE-COMRADES MARATHON
BAYOGIJIMA kwiBerlin Marathon ozakwabo bakaBongumusa Mthembu osematheni kulezi zinsuku ngemuva kokuba ebe yingqwele kwiComrades Marathon yanonyaka eqale eThekwini yasongwa eMgungundlovu.
Leli phephandaba lithole ukuthi ozakwabo bakaMthembu abane bazokube beyingxenye yalo mjaho omkhulukazi emhlabeni.
IBerlin iba minyaka yonke ngoMandulo (September) kanti ingomunye wemijaho emikhulu emhlabeni kwazise yilapho abasubathi abaningi benza khona amarekhodi omhlaba eMarathon.
IBerlin ithathwa njengomunye wemijaho enemizila emihle kwezokugijima. Irekhodi lo mhlaba leMarathon ngu-2:02:57 elenziwe kuwo lo mjaho ngowezi-2014 libekwa nguDennis Kemetto waseKenya.
“UMthembu asikakuqinisekisi ukuthi uzolibamba yini iqhaza kulo mjaho noma ngeke. Kuzokuya ngokuthi umzimba wakhe usunjani ngosuku lo mjaho kodwa naye uzokube ekhona eyosiza ozakwabo.
"UMthembu uqatha kodwa asifuni ukumjaha. Sithola izimemo eziningi ezifuna ukuba lo msubathi azobamba iqhaza emijahweni eyahlukene.
"Umjaho engingakuqinisekisa ukuthi uzokube ebambe iqhaza kuwo yiLegends Marathon (68km) ezokuba sekupheleni kukaMa- ndulo igijinywa phakathi koMthatha neBisho.
“Omunye amenywe kuwona yi100km trial run enqotshwe nguProdigal Khumalo nyakenye. Yona izokuba mhla zimbili kuZibandlela (December) eCape Town. Kulo mjaho uMthembu uzophinde enzelwe umcimbi wokumbonga ngempumelelo yakhe kwiComrades eCape Town,” kusho uXolani Mabhida ongumqeqeshi kaMthembu.
UMthembu ngomunye wabasubathi abangaphansi kohlelo lo Mnyango WezeMidlalo waKwaZulu-Natal lapho beziqeqesha ePrime High Performance Centre eseMoses Mabhida, eThekwini kanti ubhekwe ngabomvu ukuba akhale emuke nomklomelo omqoka kwiKZN Sports Awards ezokuba ekupheleni konyaka khona belu eThekwini.
UMthembu uzokube eyingxenye ye-10th Association for Sport Performance Centres (ASPC) International Forum ezokuba ngoLwesithathu kusuka ngo-10 ekuseni ePrime High Performance Centre, eThekwini.
Kulo mcimbi kuzokube kukhona bonke abasubathi besifundazwe abenze kahle kwiComrades Marathon yanonyaka.
Kulo mcimbi kuzokube kukhona uGideon Sam onguMengameli weSouth African Sports Confederation and Olympic Committee (Sascoc) noMnyango WezeMidlalo waKwaZulu-Natal oholwa nguBongi-Sithole Moloi.