Ukhonjwa e-Russia umdlali weSundowns
Amakilabhu akhala ngentengo kaR30 million
UKHONJWA e-Russia umdlali weMamelodi Sundowns ongazange abe nesizini enhle ngenxa yokulimala.
Leli phephandaba lincinzwe yimithombo yalo ukuthi uKhama Billiat odlala phambili kwiDowns angase alibhekise e-Europe njengoba kunamakilabhu amfunayo.
UBilliat odabuka eZimbabwe akazange abe nayo isizini enhle njengoba ubephuma engena kodokotela ngenxa yokulimala.
Nakuba engazange abonakale isikhathi eside ngesizini eyedlule kodwa amakilabhu ase-Europe kuthiwa ayamlandela.
Leli phephandaba lithole ukuthi kunekilabhu yaseRussia emfuna phansi phezulu. Kuthiwa imfuna ngesizini ezayo. Nokho kuthiwa into engase ibalekise le kilabhu wukuthi imali yokuthenga inkontileka yakhe ingaphezulu kuka-R30-million okuyinto ekhalisa kwayena lo mdlali.
Leli phephandaba lishayela uThulani “TT” Thuswa wezokuxhumana kwiDowns ngalolu daba uthe:
“Ukufunwa yena uyafunwa kodwa akekho osaqhamuke nento ephathekayo ngakho-ke ayikho into esingayikhuluma.
"Thina sikhuluma ngento ebhalwe phansi hhayi eyokulokhu ubuza ngomdlali wethu. Abadlali bethu bayafunwa ngapha nangapha kodwa akekho oqhamuka nento ebhaliwe,” kusho uThuswa.
Abadlali beDowns bayinyama emakilabhini aphesheya ngemuva kokunqoba iCaf Champions League neCaf Super Cup.